ភូមិសាស្ត្រស្រុកខ្មែរ: ស្លាកលេខរថយន្ត

Friday, September 17, 2021

ស្លាកលេខរថយន្ត

ទំព័រនេះមានបំណងញែកឲ្យដាច់ វិភាគឲ្យឃើញអំពី ស្លាកលេខរថយន្តដែលមាន ០៣ ប្រភេទ គឺ

ស្លាកលេខខុសច្បាប់ Illegal Plate Number
ស្លាកលេខ ក្លែងក្លាយ និង Fake Plate Number
ស្លាកលេខ ស្ទួន (ដូចគ្នា) Duplicate Plate Number

ស្លានភាពចោរលួច ខុសច្បាប់ ក្លែងក្លាយ ឬស្លាកលេខស្ទួន មិនមែនមានតែនៅកម្ពុជាទេ សឹងគ្រប់ប្រទេស កើតដួចៗគ្នា ដោយសារ តម្លៃស្លាកលេខ រថយន្តខ្ពស់ អាចក្នុងរង្វង់ ៥០០០ ដុល្លា ឧ. ស្លាកលេខត្រឹមត្រូវមួយ ចេញដោយក្រសួង ដែលអាចធ្វើចរាចរណ៍បានដោយសេរី ម្នាក់ទៀតមានរថយន្ត អត់បង់ពន្ធនាំចូល គ្មានចុះបញ្ជី ដូច្នេះគេហ៊ានទិញស្លាកលេខ ពិត សុទ្ធ បែបនេះក្នុងតម្លៃ ៥០០០ ដុល្លា !។ ពេលគាត់ យកទៅបំពាក់លើរថយន្តគាត់ វាក្លាយជាស្លាកលេខក្លែងក្លាយ ព្រោះមិនស្របជាមួយ លេខម៉ាស៊ីន លេខតួរ អត្តសញ្ញាណបណ្ណ អាស័យដ្ឋាន..។ ចំណែកលេខស្ទួន គេច្រើនប្រើសម្រាប់ក្រុមគ្រួសារគេ ដូចជាគ្រួសារអ្នកមានស្តុកស្តុម គេទិញរថយន្តស្របច្បាប់ មានពន្ធនាំចូល មានចុះបញ្ជី មានស្លាកលេខត្រូវត្រូវ បន្ទាប់គេទិញ រថយន្តចែកកូនៗគេចំនួន ៤ គ្រឿងទៀត ជារថយន្តលោតឆ័ត្រ សេះហោះ ពាក់ស្លាកលេខ ដូចជាមួយ រថយន្ត១គ្រឿងខាងលើ គេអាចបើកបរបាន ព្រោះគ្មានអ្នកប្តឹង សុទ្ធតែជាក្រុមគ្រួសារគេ !!

ករណីស្លាកលេខដូចគ្នា មាន ០៤ ករណី អាចថា ចោរលួចស្លាកលេខហ្សីន តែម្ចាស់ពាក់ស្លាកលេខក្លែងក្លាយ ឬ កូពី Copy. វាអាចថា ក្រុមហ៊ុនលក់រថយន្តខុសច្បាប់ ឬ មិនចុះបញ្ជី Unregistered Dealer បានន័យថា ពួកគេ ផលិតស្លាកលេខក្លែងដាក់លក់ ដោយរថយន្តមានតម្លៃថោក បូកស្លាកលេខមានស្រាប់ ! និង អាចថា ក្រសួងនឹង អ្នកលក់រថយន្ត មិនសហការណ៍គ្នា ដូចជា អ្នកលក់មានស្លាបកលេខស្រាប់ បែបដូច់ជា អ្នកលក់ កាតទូរស័ព្ទ មានកាតរាប់សិប ដាក់ជាប់ខ្លួន ចំណែកក្រុមហ៊ុនធំ ឬ ក្រសួងចេះតែចេញ ស្លាកលេខ?

ថ្ងៃអង្គារ, ទី26 ខែខែកញ្ញា, 2017 10:56 ព្រឹក QR Code លើស្លាកលេខរថយន្ត បង្ហាញពីភាពត្រឹមត្រូវនៃការចុះបញ្ជីរថយន្ត ចាប់ពីខែកក្កដា នេះតទៅ រាល់ការចេញស្លាកលេខរថយន្ត នឹងត្រូវបានដាក់ QR Code ទាំងអស់ ដើម្បីចៀសវាសការប្រើប្រាស់ស្លាកលេខក្លែងក្លាយ ឬលេខសេះហោះ។ នេះបើយោងតាមការឲ្យដឹងពី គេហទំព័ររបស់ក្រសួងសាធារណការ និងដឹកជញ្ជូន ចេញផ្សាយកាលពីម្សិលមិញនេះ។ ស្លាកលេខរថយន្ត ដែលបានបោះពុម្ព ចាប់ពីខែកក្កដានេះតទៅ នឹងមានអ៊ុតភ្ជាប់នូវ QR Code ហើយយ៉ាងណាស់មាន ១៥០០រថយន្ត នៅក្នុងខែកក្កដានេះ ដែលស្លាកលេខភ្ជាប់ដោយ QR Code។ ការដាក់ QR Code លើស្លាកលេខរថយន្តនេះ នឹងបង្កភាពងាយស្រួលដល់ការគ្រប់គ្រងត្រួតពិនិត្យរបស់សមត្ថកិច្ចផងដែរ ដោយគ្រាន់តែយកទូរស័ព្ទដៃស្កេនលើស្លាកលេខ វានឹងបញ្ជាក់នូវទិន្នន័យគ្រប់ទាំងអស់ រួមមានប្រភេទរថយន្ត ពណ៌ លេខតួ លេខម៉ាស៊ីន។ ចំពោះព័ត៌មានទាក់ទងនឹងឈ្មោះម្ចាស់រថយន្ត អាសយដ្ឋានរបស់ម្ចាស់យានយន្ត មិនត្រូវបានផ្តល់ឲ្យនោះទេ ដើម្បីរក្សាសុវត្ថិភាព និងជួយការពារដល់ម្ចាស់រថយន្ត។ លើសពីនេះទៅទៀត ក្រសួងសាធារណការ នឹងតភ្ជាប់ប្រព័ន្ធនេះជាមួយនឹងពន្ធដារ និងគយបន្ថែមទៀត ដើម្បីងាយស្រួលក្នុងការស្វែងរកមើលថា យានយន្តមួយណាបង់ពន្ធ ឬមិនបង់ពន្ធ។ គួរជម្រាបដែរថា ក្រសួងសាធារណការ កំពុងតែសហការជាមួយធនាគារអភិវឌ្ឍន៍អាស៊ី និងធនាគារពិភពលោក ធ្វើការសិក្សា និងកែលម្អប្រព័ន្ធស្លាកសញ្ញាចរាចរណ៍ ការគូសសញ្ញាចរាចរណ៍ នៅទូទាំងប្រទេសផងដែរ៕

ថ្ងៃសុក្រ, ទី23 ខែខែកុម្ភៈ, 2018 07:10 ព្រឹក ក្រសួង បង្ហាញវិធីចុះបញ្ជីយានយន្ត និងទិញស្លាកលេខតាមអនឡាញ ក្នុងពេល ១ថ្ងៃ ក្រសួងសាធារណការ និងដឹកជញ្ជូន កែប្រែប្រព័ន្ធស្វ័យប្រវត្តិកម្ម ឲ្យការទទួលសេវាចុះបញ្ជីរថយន្ត ដែលធ្លាប់ចំណាយពេល ១០ ទៅ ៣០ថ្ងៃ មកនៅត្រឹមតែ ១ថ្ងៃតែប៉ុណ្ណោះ។ នេះបើយោងតាមការឲ្យដឹងពី គេហទំព័រក្រសួងសាធារណការ និងដឹកជញ្ជូន។

វីដេអូនេះនឹងបង្ហាញលោកអ្នកអំពីវិធី៖

– ជ្រើសរើសលេខពិសេស
– ជ្រើសរើសទំហំផ្លាកលេខ
– ដាក់ពាក្យស្នើសុំចុះបញ្ជី និងឯកសារភ្ជាប់
– ណាត់កាលវិភាគឆៀករថយន្ត
– និងទូទាត់ប្រាក់សេវាដោយខ្លួនឯង។

ប្រព័ន្ធនេះ នឹងកាត់បន្ថយចំណាយក្រៅផ្លូវការ ផ្តល់សេវាងាយស្រួល និងឆាប់រហ័ស ចំណេញវេលា អាចធ្វើបានពីគ្រប់ពេលវេលា គ្រប់ទីកន្លែង។ សម្រាប់ប្រឹក្សាយោបល់បន្ថែម លើការដាក់ពាក្យ សូមទំនាក់ទំនង៖ 085 92 90 90 – 015 92 90 90 – 067 92 90 90។ យ៉ាងណាមិញ ប្រជាពលរដ្ឋដែលជាម្ចាស់រថយន្ត អាចធ្វើការចុះបញ្ជីរថយន្តដោយខ្លួនឯងផ្ទាល់តាមរយ: អាសយដ្ឋាន៖ https://vehicle.mpwt.gov.kh/ ជ្រើសរើសនូវស្លាកលេខណាមួយ ដែលខ្លួនពេញចិត្ត និងអាចរើសទំហំវែង ឬធំ ហើយបង់ប្រាក់ជាមួយ Wing LyHour Smartluy រួចយកឯកសារច្បាប់ដើម ទៅតម្កល់នៅទីតាំងផ្តល់សេវាសាធារណ:របស់ ក្រសួងសាធារណការ ដើម្បីទទួលបានផ្លាកលេខ នឹងបណ្ណសម្គាល់រថយន្ត៕

ប៉ិច សុធារី | Publication date 21 October 2015 | 10:33 ICT នគរបាលនឹងដាក់ទោសអ្នកប្រើស្លាកលេខរថយន្តក្លែងក្លាយរថយន្តដឹកដីមួយគ្រឿងពាក់ស្លាកលេខកងយុទ្ធពលខេមរភូមិន្ទបើកតាមផ្លូវក្នុងរាជធានីនាពេលកន្លងមក។ រថយន្តដឹកដីមួយគ្រឿងពាក់ស្លាកលេខកងយុទ្ធពលខេមរភូមិន្ទបើកតាមផ្លូវក្នុងរាជធានីនាពេលកន្លងមក។ រូបថត ហ្វេសប៊ុក ភ្នំពេញៈ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនឹងចាត់វិធានការដាក់ទោសទណ្ឌតាមច្បាប់ទៅលើអ្នកបើកបរទាំងឡាយណាដែលប្រើប្រាស់ប័ណ្ណបើកបរ ឬយានជំនិះបំពាក់ស្លាកលេខ និងលិខិតអនុញ្ញាតផ្សេងៗដែលក្លែងក្លាយព្រមទាំងអំពាវនាវដល់សាធារណជនឲ្យចូលរួមផ្តល់ព័ត៌មានក្នុងករណីមានការសង្ស័យ។

យោងតាមសេចក្តីជូនដំណឹងរបស់នាយកដ្ឋាននគរបាលចរាចរណ៍ និងសណ្តាប់ធ្នាប់នៃអគ្គស្នងការដ្ឋាននគរបាលជាតិកាលពីថ្ងៃម្សិលមិញបានលើកឡើងថាកន្លងមកមានអ្នកបើកបរយានយន្តមួយចំនួនធ្វើចរាចរណ៍តាមផ្លូវសាធារណៈប្រើប្រាស់ប័ណ្ណបើកបរ ប័ណ្ណសម្គាល់យានជំនិះ ស្លាកលេខយានជំនិះ លិខិតអនុញ្ញាត ផ្សេងៗជាវត្ថុក្លែងក្លាយ និង បំពាក់ស្លាកលេខយានយន្តស្ទួនគ្នា ដែលផ្ទុយពីច្បាប់ស្តីពីចរាចរណ៍ផ្លូវគោក។

ដើម្បីចូលរួមគោរពប្រតិបត្តិច្បាប់ស្តីពីចរាចរណ៍ផ្លូវគោកឲ្យមានប្រសិទ្ធភាពខ្ពស់ទប់ស្កាត់អំពើល្មើសច្បាប់ និងកាត់បន្ថយគ្រោះថ្នាក់ចរាចរណ៍នៅកម្រិតទាបនាយកដ្ឋានស្នើឲ្យសាធារណជន និងមន្ត្រីអនុវត្តច្បាប់ទាំងអស់ចូលរួមសហការ និងផ្តល់ព័ត៌មានមកកាន់នាយកដ្ឋានក្នុងករណីពិនិត្យឃើញអ្នកបើកបរប្រើប្រាស់ប័ណ្ណបើកបរ ឬយានជំនិះបំពាក់ស្លាកលេខ និងលិខិតអនុញ្ញាតផ្សេងៗដោយសង្ស័យជាវត្ថុក្លែងក្លាយតាមរយៈលេខទូរស័ព្ទ ០២៣ ៧២០ ២៥៩, ០១២ ២២១ ២១២, ០១៧ ៨៧៨ ១៦៦, ០៦៦ ៤៤៤ ៤០៨, ០៨៩ ៧៥៦ ០០៦ និង ០៩៧ ៧៩៩ ១៥៥១។ សេចក្តីជូនដំណឹងបញ្ជាក់ថា៖ «នាយកដ្ឋាននឹងចាត់វិធានការតាមច្បាប់ជាធរមាន»។

ច្បាប់ស្តីពីចរាចរណ៍ផ្លូវគោកថ្មីមាត្រា ៧៨ និង ៧៩ បានចែងថាជនណាដែលចរាចរណ៍យានជំនិះដោយប្រើប្រាស់ប័ណ្ណបើកបរ ប័ណ្ណសម្គាល់យានជំនិះ ស្លាកលេខយានជំនិះ ឬលិខិតអនុញ្ញាតផ្សេងៗដោយដឹងថាឯកសារ ឬវត្ថុក្លែងក្លាយត្រូវផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ៤ ទៅ ១០ លានរៀល។ ចំណែកជនណាក្លែងប័ណ្ណបើកបរ ប័ណ្ណសម្គាល់យានជំនិះ ស្លាកលេខសម្គាល់យានជំនិះ ឬលិខិតអនុញ្ញាតផ្សេងៗដោយចេញដោយអ្នករាជការសាធារណៈត្រូវផ្តន្ទាទោសដាក់ពន្ធនាគារពី ៥ ទៅ ១០ ឆ្នាំតាមក្រមព្រហ្មទណ្ឌ។

អ្នកសម្របសម្រួលបណ្តាញរួបរួមដើម្បីគណនេយ្យភាពសង្គម អាស៊ី បូព៌ា និងប៉ាស៊ីហ្វិក លោក សន ជ័យ កត់សម្គាល់ថាការបំពាក់ស្លាកលេខរថយន្តស្ទួនភាគច្រើនជារថយន្តស៊េរីទំនើបរបស់អ្នកមានលុយមានអំណាចជាពិសេសរថយន្តស្លាកលេខ ន.ប និង ខ.ម។

តែយ៉ាងណាលោកបានគាំទ្រចំពោះចំណាត់ការនេះដើម្បីចៀសវាងការខាតបង់ចំណូលថវិកាជាតិលើពន្ធមធ្យោបាយលុបបំបាត់អំពើល្មើសច្បាប់ និងកាត់បន្ថយគ្រោះថ្នាក់ចរាចរណ៍ព្រោះរថយន្តដែលប្រើប្រាស់ស្លាកលេខ ឬលិខិតក្លែងក្លាយទាំងនោះច្រើនតែជារថយន្តគេចពន្ធ។

លោកថា៖ «យើងឃើញហើយតាមហ្វេសប៊ុកជួនកាលមានឡានស្លាក ខ.ម ចំនួន ៣ គ្រឿង ពាក់ស្លាកលេខស្ទួនតែមួយអ៊ីចឹងបើបើកឲ្យមានការរាយការណ៍ក៏ល្អដែរតែយើងបារម្ភពីសុវត្ថិភាពអ្នករាយការណ៍ហ្នឹងដែរដូច្នេះការឆ្លើយតបត្រូវតែធ្វើឲ្យទាន់ពេលវេលា»៕

ភ្នំពេញ៖ កម្លាំងនគរបាលប៉ុស្តិ៍សំរោងក្រោម បានឃាត់រថយន្តម៉ាកតូយ៉តា ព្រូស ស៊េរីឆ្នាំ២០១០ ពណ៌ស មួយគ្រឿង តាមបណ្ដឹងរបស់ម្ចាស់រថយន្តម៉ាកតូយ៉ូតាព្រូសស៊េរី ឆ្នាំ២០១០ ពណ៌កាំម៉ៃមួយគ្រឿងទៀត។ រថយន្តទាំងពីរគ្រឿង ដែលដូចកូនភ្លោះនេះ ត្រូវបានម្ចាស់ បើកបរតាមផ្លូវ ហើយបំពាក់ស្លាកលេខដូចគ្នាបេះបិត។ហេតុការណ៍នេះ បានកើតឡើង កាលពីវេលាម៉ោង ៣រសៀលថ្ងៃទី១៦ ខែកញ្ញា ឆ្នាំ២០២១ នៅតាមផ្លូវបេតុង ក្នុងបុរីពិភពថ្មី ឈូកវ៉ា២ ក្នុងភូមិតិក្ខបញ្ញា សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

នគរបាល បានប្រាប់ថា រថយន្តម៉ាក តូយ៉ូតា ព្រូសទាំង ២គ្រឿងនោះ ពាក់ស្លាកលេខ ភ្នំពេញ 2BK-4454 ហើយ ១គ្រឿង ពណ៌ស មានបិតស្កុតខ្មៅ លើស្តុបក្រោយ។ រថយន្តនេះ គ្មានឯកសារសម្គាល់អ្វីទាំងអស់ ហើយស្លាកលេខ មានប្រព័ន្ធ QR Code ដែរ តែស្គែនទិន្នន័យ អត់ចេញអ្វីឡើយ។ គេសង្ស័យថា ជាស្លាកលេខក្លែងក្លាយ។ ចំណែករថយន្តព្រូស ១គ្រឿងទៀត ពណ៌កាំម៉ៃ មានឯកសារត្រឹមត្រូវ គ្រប់គ្រាន់ទាំងអស់ ហើយប្រើប្រព័ន្ធ QR Code ស្គែន ចេញទិន្នន័យជាធម្មតា ដែលបញ្ជាក់ថា ស្របច្បាប់។

នគរបាល បានប្រាប់ថា នៅមុនពេលកើតហេតុ ម្ចាស់រថយន្ត ដែលមានឯកសារត្រឹមត្រូវគ្រប់គ្រាន់ បានបើកបររថយន្តរបស់ខ្លួន ធ្វើដំណើរតាមផ្លូវបេតុងបុរីពិភពថ្មី ឈូកវ៉ា២ ក្នុងភូមិតិក្ខបញ្ញា សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។ ខណៈនោះ ស្រាប់តែមានការភ្ញាក់ផ្អើល ដោយគាត់បានប្រទះឃើញរថយន្តព្រូស បិតស្កុតស្តុបខ្មៅនោះ ពាក់ស្លាកលេខដូចរថយន្តរបស់ខ្លួន កំពុងបើកបរ នៅតាមផ្លូវជាមួយគ្នានោះដែរ។

ប្រភពដដែល បានបន្តទៀតថា ពេលនោះ គាត់ក៏បានដេញតាម និងប្ដឹងឲ្យកម្លាំងនគរបាលប៉ុស្តិ៍សំរោងក្រោម ជួយឃាត់ទាំងរថយន្ត និងទាំងអ្នកបើកបរ នាំទៅសាកសួរនៅប៉ុស្តិ៍តែម្ដង។ ពេលនាំទៅដល់ប៉ុស្តិ៍សំរោងក្រោម នគរបាល បានសួរនាំអ្នកបើកបររថយន្តសង្ស័យនោះ ដើម្បីរកឯកសារសម្គាល់យានយន្ត។ ប៉ុន្តែបុរសនោះ បានឆ្លើយថា អត់មានទេ មិនតែប៉ុណ្ណោះ បុរសនោះ បាននិយាយទៀតថា រថយន្តនេះ ពុំមែនជារបស់ខ្លួនឡើយ គឺខ្លួនបានខ្ចីពីបងប្អូនជីដូនមួយ ជិះតែប៉ុណ្ណោះ។ក្រោយមក នគរបាល បានសម្រេចដកហូតរថយន្តទាំង ២គ្រឿង ទុកសិន ដើម្បីធ្វើការស្រាវជ្រាវ និងរង់ចាំមន្ត្រីជំនាញ ក្រសួង និងមន្ទីរសាធារណការ និងដឹកជញ្ជូន ពិនិត្យបន្តទៀត។ ជាចុងក្រោយ ម្ចាស់រថយន្តព្រូស ដែលមានឯកសារត្រឹមត្រូវ បានសម្រេចឈប់ប្ដឹង តែសំណូមពរឲ្យនគរបាល ជួយដកហូតយកស្លាកលេខពីរថយន្តសង្ស័យនោះទុក៕ យន់ ស៊ីថា

២៨-០៩-២០១៨ [BANGKOK POST] - ស្រេច! ដឹងការពិតមូលហេតុឡាន PRIUS ពីរគ្រឿងពាក់ស្លាកលេខ 2AM-3005 ដូចគ្នាកំពុងល្បីខ្លាំង រឿងឡាន Prius ពីរគ្រឿងដោយមួយពណ៌ឈាមជ្រូកស៊េរី ០៥ និងមួយទៀតស៊េរី ២០១២ ពណ៌ស ពាក់ស្លាកលេខ 2AM-3005 ដូចគ្នា តាមពិត ឡាន Prius ស៊េរី ២០១២ ពណ៌សនោះម្ចាស់បានលួច ស្លាកលេខគេមកដាក់ប៉ុណ្ណោះ តែចៃដន្យជនរងគ្រោះឃើញក៏ប្តឹងមកសមត្ថកិច្ច ក្រោយបាត់ស្លាកលេខ ឡានខ្លួនតាំងពីខែមិថុនា ឆ្នាំ ២០១៨ មកម្ល៉េះ។ សមត្ថកិច្ចបានចាប់បានបុរសម្នាក់ ដែលបានលួចស្លាកលេខឡាន 2AM-3005 យកមក ដាក់លើឡានម៉ាក Prius ស៊េរី ២០១២ ពណ៌សរបស់ខ្លួនយ៉ាងសង្ហារ ក្រោយជនរងគ្រោះជា ម្ចាស់ស្លាកលេខឡានបានប្រទះឃើញឡានជនសង្ស័យមានស្លាកលេខដូចខ្លួន។ ហេតុការណ៍ចុះឃាត់ខ្លួននេះ ដោយមានពាក្យបណ្ដឹងជនរងគ្រោះ ហើយខាង សមត្ថកិច្ចនគរបាលប៉ុស្តិ៍ផ្សារថ្មី ៣ ខណ្ឌដូនពេញ ដោយបានឃាត់ខ្លួនយកជនសង្ស័យឈ្មោះ ផុន ផានិត ភេទ ប្រុស អាយុ ២៨ ឆ្នាំ មកនគដបាលរដ្ឋបាលប៉ុស្តិ៍ទំពុន១ ខណ្ឌមានជ័យតែម្តង ក្រោយ ជនរងគ្រោះជាម្ចាស់ឡាន Prius ពណ៌ឈាមជ្រូកស៊េរី ០៥ នោះឃើញឡានជនសង្ស័យនៅម្តុំស្តុកសូរិយាម៉ល។ តាមពិតទៅរថយន្ត Prius ស៊េរី ២០១២ ពណ៌សរបស់ជនសង្ស័យ បានទិញពីឈ្មោះ ហុង ស្រី ភេទស្រី អាយុ ២៨ឆ្នាំតម្លៃតែ ១២ ៥០០ ដុល្លារ ដោយអត់ពន្ធ ក៏កើតចិត្តទៅលួចស្លាកលេខ 2AM-3005 របស់ជនរងគ្រោះមកដាក់ឡានខ្លួន ហើយខណៈជនរងគ្រោះដាក់ពាក់បណ្តឹង ក៏ចៃដន្យឃើញឡាន ជនសង្ស័យមានស្លាកលេខដូចខ្លួនតែម្តង ហើយក៏ប្តឹងទៅសមត្ថកិច្ចមកចុះចាប់ដល់កន្លែង៕

ចុះបញ្ជីយានជំនិះ នៅក្នុងប្រទេសកម្ពុជា ប្រសិនបើលោកអ្នកចង់ចរាចរយានជំនិះរបស់លោកអ្នក នៅតាមដងផ្លូវ ដោយស្របច្បាប់ លោកអ្នកត្រូវតែធ្វើការចុះបញ្ជីយានជំនិះរបស់លោកអ្នក ទៅតាមនីតិវិធីច្បាប់ដែលបាន កំណត់។ ចំពោះការចុះបញ្ជីរថយន្ត លោកអ្នកអាចធ្វើការស្នើសុំចុះបញ្ជីដោយខ្លួនឯងបាតាមរយៈប្រព័ន្ធ ស្វ័យប្រវត្តិកម្មចុះបញ្ជីយានយន្ត ដែលមានអាសយដ្ឋាន https://vehicle.mpwt.gov.kh ដោយលោកអ្នកអាច ជ្រើសរើសផ្លាកលេខដែលលោកអ្នកពេញចិត្ត ហើយធ្វើការបំពេញព័ត៌មានចុះបញ្ជីដោយខ្លួនឯង ដោយមិនចាំបាច់ធ្វើការចំណាយក្រៅផ្លូវការផ្សេងៗ។

លក្ខខណ្ឌដែលអាចចុះបញ្ជីរថយន្តដោយខ្លួនឯងបាន លោកអ្នកត្រូវបង្កើតគណនីមួយ រួចបំពេញព័ត៌មានផ្ទាល់ខ្លួន ព័ត៌មានរថយន្ត ព្រមទាំងបញ្ចូលរូបភាពបង្កាន់ដៃពន្ធនាំចូល លិខិតទិញលក់រថយន្ត វិញ្ញាបនបត្រត្រួតពិនិត្យលក្ខណៈបច្ចេកទេស រួមជាមួយអត្តសញ្ញាណបណ្ណសញ្ជាតិខ្មែរ ឬសៀវភៅស្នាក់នៅ ឬសៀវភៅគ្រួសារ របស់ម្ចាស់រថយន្ត។ ក្រោយបំពេញព័ត៌មានគ្រប់គ្រាន់ហើយ លោកអ្នកធ្វើការ បោះពុម្ពវិក្កយបត្រ ដើម្បីបង់ប្រាក់ជាមួយបញ្ជរ វីង ឬស្មាតលុយ ឬលីហួរ ឬក៏តាមគណនីវីងផ្ទាល់ខ្លួន របស់លោកអ្នក។ សម្រាប់តម្លៃសេវានៃការចុះបញ្ជីរថយន្ត លោកអ្នកត្រូវបង់ប្រាក់ចំនួន ១២៥,០០០ រៀល បូកជាមួយនឹងតម្លៃផ្លាកលេខនីមួយៗដែលលោកអ្នកពេញចិត្ត។

ចំពោះការចុះបញ្ជីទោចក្រយានយន្ត ឬត្រីចក្រយានយន្ត លោកអ្នកអាចធ្វើការចុះបញ្ជីជាមួយនឹង ហាងលក់ម៉ូតូទូទាំងប្រទេស និងនៅតាមមន្ទីរសាធារណការ និងដឹកជញ្ជូនរាជធានី ខេត្តនីមួយៗ ឬនៅ តាមការិយាល័យច្រកចេញចូលតែមួយ គ្រប់ខណ្ឌនៅរាជធានីភ្នំពេញ និងនៅតាមបណ្តាខេត្តនីមួយៗ។ សម្រាប់តម្លៃនៃការចុះបញ្ជីទោចក្រយានយន្ត និងត្រីចក្រយានយន្ត លោកអ្នកត្រូវចំណាយ ៤០,០០០ រៀល ហើយលោកអ្នកអាចទទួលបានផ្លាកលេខភ្លាមៗនៅនឹងកន្លែង ដែលលោកអ្នកស្នើសុំចុះបញ្ជី។ ដោយឡែក បណ្ណសម្គាល់ទោចក្រយានយន្ត ឬត្រីចក្រយានយន្តរបស់លោកអ្នក នឹងត្រូវចេញជូនតាម ក្រោយបន្ទាប់ពីរង់ចាំមន្ត្រីពិនិត្យ និងអនុម័ត ដើម្បីធ្វើការបោះពុម្ព៕

2020-09-22 04:27pm (កំពង់ឆ្នាំង)៖ បន្ទាប់ពីពិនិត្យឃើញមានភាពមិនប្រក្រតីចំពោះរថយន្តធុនធំដឹកទំនិញចំនួន២គ្រឿង ដែលមានពាក់ស្លាកលេខដូចគ្នា ដឹកទំនិញចេញពីខេត្តបាត់ដំបងឆ្លង កាត់ខេត្តកំពង់ឆ្នាំង ត្រូវបានព្រះរាជអាជ្ញាអមសាលាដំបូងខេត្តកំពង់ឆ្នាំង បញ្ជាឲ្យប៉ូលីសសេដ្ឋកិច្ច នៃស្នងការដ្ឋាននគរបាលខេត្តឃាត់ ដើម្បីត្រួតពិនិត្យស្លាកលេខ និងទំនិញនៅលើរថយន្ត។

រថយន្តធុនធំដឹកទំនិញទាំងពីរគ្រឿងនេះ គឺជាប្រភេទរថយន្តសឺមីសណ្ដោងរ៉ឺម៉ក បន្ទាប់ពីសមត្ថកិច្ចបានឃាត់ទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំងរួចមក សមត្ថកិច្ចជំនាញបានរកឃើញថារថយន្តទាំង២គ្រឿងនេះ ប្រាកដជាប្រើប្រាស់ស្លាកលេខក្លែងក្លាយដូចគ្នាពិតមែន។

*ទី១៖ រថយន្តម៉ាក HYUNAI ពណ៌ទឹកប៊ិច ពាក់ផ្លាកកលេខតាកែវ 3A-1438 កន្ទុយរ៉ឺម៉កសណ្ដោង ពាក់ផ្លាកលេខ ភ្នំពេញ 4A-2487។ ឯកសារបង់ពន្ធផ្លូវ គឺផ្លាកលេខភ្នំពេញ 3A-3180 បើកបរដោយឈ្មោះ ជឿន បូទុំ ភេទប្រុស អាយុ២៦ឆ្នាំ មានទីលំនៅភូមិស្នោ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង។
*ទី២៖ រថយន្តម៉ាក FUSO ពណ៌ស ពាក់ស្លាកលេខតាកែវ 3A-1438 ដូចរថយន្តខាងលើដែរជាប្រភេទរថយន្ត សឺមីសណ្ដោងរ៉ឺម៉កដូចគ្នា កន្ទុយសណ្ដោងរ៉ឺម៉ក ពាក់ស្លាកលេខតាកែវ 4A- 0881 បើកបរដោយឈ្មោះ សុខ ពៅ អាយុ៣៦ឆ្នាំ រស់នៅក្នុងភូមិបន្លាស្អិត សង្កាត់ឃ្មួញ ខណ្ឌសែនសុខ រាជធានីភ្នំពេញ។

កាលពីថ្ងៃទី២១ ខែកញ្ញា ឆ្នាំ២០២០ ព្រះរាជអាជ្ញាអមសាលាដំបូងខេត្តកំពង់ឆ្នាំង បានចាត់ឱ្យសមត្ថកិច្ចចំរុះដែលមានសមាសភាពរួមមាន៖ នគរបាលប្រឆាំងបទល្មើសសេដ្ឋកិច្ច, នគរបាលចរាចរណ៍ផ្លូវគោក, មន្ត្រីគយសាខាខេត្ត ដឹកនាំដោយលោកព្រះរាជអាជ្ញារង ទី មុន្និន ដើម្បីធ្វើការឆែរឆេរត្រួតពិនិត្យផ្ទៀងផ្ទាត់ទំនិញនៅលើរថយន្តទាំង២គ្រឿងនេះ ខ្លាចមានបង្កប់ទំនិញគេចពន្ធ រីឯរថយន្តទាំង២គ្រឿងនេះ ជាកម្មសិទ្ធិរបស់ឈ្មោះ ធារី ភេទស្រី និងឈ្មោះ និត ដោយមានបិទឡូហ្គូដឹកជញ្ជូនរបស់ក្រុមហ៊ុនអក្សរ K នៅលើកញ្ចក់រថយន្តទាំង២គ្រឿងនេះផងដែរ។

លោក ឈឹម សារុន នាយការិយាល័យនគរបាលចរាចរណ៍ផ្លូវគោកខេត្តកំពង់ឆ្នាំង លោកបានឲ្យអង្គភាពព័ត៌មាន Fresh News ដឹងនៅរសៀលថ្ងៃទី២២ ខែកញ្ញា ឆ្នាំ២០២០នេះថា ការឆែកឆេរទំនិញនៅលើរថយន្តទាំង២ គ្រឿងនេះ គឺបានប្រព្រឹត្តទៅតាំងពីព្រឹកថ្ងៃ ទី២១ ខែកញ្ញា ឆ្នាំ២០២០ នឹងរួចរាល់នៅវេលាម៉ោង ៣រសៀលថ្ងៃទី២២ ខែកញ្ញា ឆ្នាំ ២០២០នេះ។

លទ្ធផលនៃការឆែកឆេរត្រួត ពិនិត្យទំនិញនៅលើរថយន្តទាំងពីរគ្រឿងនោះ កម្លាំងចម្រុះបានរកឃើញមានតែមីមួយមុខតែប៉ុណ្ណោះ រីឯថាតើទំនិញលើសការ កំណត់បង់ពន្ធ ឬយ៉ាងណាៗនោះលោកមិនបានដឹងទេ រឿងនេះទាក់ទងទៅនឹងនីតិវិធីរបស់មន្ត្រីគយ។

ចំពោះរថយន្តទាំងពីរគ្រឿងខាងលើនេះប្រើ ប្រាស់ស្លាកលេខក្លែងក្លាយ គឺខុសទៅនឹងផ្លូវច្បាប់ទាំងស្រុងដែលគេអាចចោទបាន ពីបទប្រើប្រាស់ឯកសារសាធារណៈក្លែង។ ឥឡូវចំពោះរថយន្តទាំង២គ្រឿងនេះ បន្ទាប់ពីរើទំនិញចេញហើយលោក នឹងយកទៅរក្សាទុកនៅការិយាល័យចរាចរណ៍ផ្លូវគោករង់ចាំចំណាត់ការពីតុលាការ។

បើយោងតាមប្រភពក្រៅផ្លូវការ ដែលបានបង្ហើបប្រាប់ឲ្យដឹងថា ថ្ងៃដែលសមត្ថកិច្ចឃាត់រថយន្ដពីរគ្រឿងខាងលើនេះ គឺរថយន្តទាំងអស់មាន ៣គ្រឿងដែលពាក់ស្លាកលេខតែមួយដូចគ្នា ដោយឡែកមួយគ្រឿងទៀត បានបើកហួសទៅបាត់ នៅសល់តែពីរគ្រឿងត្រូវបានសមត្ថកិច្ចឃាត់បាន ហើយរថយន្តទាំងអស់ខាងលើនេះ ពេលឡើងអីវ៉ាន់នៅផែស្ងួត លីគា បាត់ដំបងរថយន្តទាំងអស់បានដូរស្លាកលេខទៅជាស្លាកលេខតាកែវ 3A-1438 វិញមុនគយធ្វើការត្រួតពិនិត្យ ហើយរថយន្តទាំងអស់ផងដែរគឺគេកំណត់២ម៉ោង ឲ្យចេញម្ដង។

ប្រភពបានបង្ហើបបន្តទៀតថា រថយន្តដឹក ទំនិញទាំងអស់ ពេលបើកឆ្លងកាត់ខេត្តពុំបានឆ្លងកាត់ការត្រួតពិនិត្យតាមខេត្តនីមួយៗរហូតដល់ភ្នំពេញ។ ហើយរថយន្តទាំងអស់ខាងលើនេះផងដែរ ពេលសមត្ថកិច្ចឃាត់ភ្លាមសួររកឯកសារអនុញ្ញាតិការដឹកជញ្ជូន រកពុំឃើញមានឯកសារដែលពាក់ព័ន្ធក្នុងការដឹកជញ្ជូននោះឡើយ។

ជុំវិញករណីទាំងអស់នេះ សមត្ថកិច្ចក៏ដូចជាប្រជាពលរដ្ឋសង្ឃឹមថា តុលាការនឹងស៊ើបអង្កេតយ៉ាងច្បាស់លាស់ដើម្បីវែកមុខ រកម្ចាស់រថយន្ត ក៏ដូចជាមន្ត្រីខូចមួយចំនួន ដែលបានពាក់ព័ន្ធ ដើម្បីយកមកកាត់ទោសក្នុងពេលឆាប់ៗខាងមុខនេះ៕

ឃុត សុភចរិយា | Publication date 30 November 2020 | 08:50 ICT តុលាការឃុំខ្លួនបុរសម្នាក់ពីបទក្លែងបន្លំឯកសារ ប្រើស្លាកលេខរថយន្តក្លែងក្លាយ កំពង់ឆ្នាំងៈ សាលាដំបូងខេត្តកំពង់ឆ្នាំង បានសម្រេចឱ្យសមត្ថកិច្ចឃុំខ្លួនបុរសម្នាក់នៅថ្ងៃទី ២៨ ខែវិច្ឆិកា ដោយចោទប្រកាន់ជនសង្ស័យពីបទក្លែងបន្លំឯកសារ (យានយន្ត) និងប្រើប្រាស់ស្លាកលេខក្លែងក្លាយ។ នេះបើតាមមន្ត្រីកងរាជអាវុធហត្ថខេត្តបញ្ជាក់កាលពីថ្ងៃអាទិត្យ។

លោក ហង្ស សុជាតិ ប្រធានមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្តកំពង់ឆ្នាំងបានប្រាប់ភ្នំពេញប៉ុស្តិ៍ពីម្សិលមិញថាជនសង្ស័យឈ្មោះ ឃឹម ប៊ុនធឿន មានលំនៅភូមិត្រពាំងពោធិ៍ ឃុំពង្រ ស្រុករលាប្អៀរ ខេត្តកំពង់ឆ្នាំង ត្រូវបានឃាត់ខ្លួនកាលពីរសៀលថ្ងៃទី ២៦ ខែវិច្ឆិកា ឆ្នាំ ២០២០ ខណៈដែលជនសង្ស័យកំពុងធ្វើដំណើរនៅឃុំខ្សា ស្រុករលាប្អៀរ។លោក ហង្ស សុជាតិ បានថ្លែងថា៖ «ជនសង្ស័យបានប្រើប្រាស់រថយន្តពាក់ស្លាកលេខក្លែងក្លាយ»។ បើតាមមន្ត្រីអាវុធហត្ថរូបនេះជនសង្ស័យមានមុខរបរបើកហ្គារ៉ាស់ជួសជុលរថយន្ត និងប្រមូលទិញ-លក់រថយន្តដែលនាំចូលគេចពន្ធពីប្រទេសវៀតណាម។ នៅថ្ងៃឃាត់ខ្លួនជននោះ សមត្ថកិច្ចជំនាញបានរកឃើញរថយន្ត LEXUS RX 400h ពណ៌ស ១ គ្រឿងដែលជនសង្ស័យកំពុងប្រើប្រាស់មានពាក់ស្លាកលេខក្លែងក្លាយ ភ្នំពេញ BD-9326 និងប្រភេទរថយន្តទំនើបៗជាច្រើនទៀតដែលមានតម្លៃចន្លោះចាប់ពី ៧ ៥០០ ដុល្លារ ទៅ ២០ ០០០ ដុល្លារអាមេរិក។

លោកបានបន្ថែមថា តាមការស្រាវជ្រាវស្លាកលេខភ្នំពេញ BD-9326 ជាស្លាកលេខរបស់រថយន្ត HIGH- LANDER ស៊េរីឆ្នាំ ២០០២ ពណ៌ខ្មៅដែលមានម្ចាស់កម្មសិទ្ធិឈ្មោះ GUO CHAO-YANG។ ក្រៅពីស្លាកលេខនេះសមត្ថកិច្ចក៏បានរកឃើញស្លាកលេខរថយន្តមួយចំនួនផ្សេងទៀតដែលសង្ស័យ ជនសង្ស័យប្រមូលទិញ «ផលចោរកម្ម» ផងដែរ។

កាលពីរសៀលថ្ងៃសៅរ៍ ជនសង្ស័យខាងលើត្រូវបានមន្ត្រីជំនាញមន្ទីរយុត្តិធម៌ខេត្តកំពង់ឆ្នាំងកសាងសំណុំរឿងបញ្ជូនទៅតុលាការ ដើម្បីមានចំណាត់ការបន្តតាមនីតិវិធីច្បាប់។

ជុំវិញករណីនេះលោក អ៊ីត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំងបានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា ក្រោយពីបញ្ចប់ការស៊ើបសួរ ជនសង្ស័យត្រូវបានតុលាការសម្រេចចោទប្រកាន់ពីបទ «ក្លែងបន្លំឯកសារ(យានយន្ត) និងប្រើប្រាស់ស្លាកលេខក្លែងក្លាយ»។ ករណីនេះ តុលាការក៏បានបង្គាប់ឱ្យសមត្ថកិច្ចនគរបាលយុត្តិធម៌នាំយកជនសង្ស័យទៅឃុំខ្លួនជាបណ្ដោះអាសន្ននៅពន្ធនាគារខេត្ត ដើម្បីធ្វើការស្រាវជ្រាវបន្ថែម និងរង់ចាំការបើកសវនាការជំនុំជម្រះជាក្រោយ។

ជាមួយគ្នានេះលោកព្រះរាជអាជ្ញាក៏បានអំពាវនាវដល់សាធារណជន ដែលបានបាត់ស្លាកលេខរថយន្ត ឬក៏បាត់រថយន្តនាពេលកន្លងមកនោះ ពួកគេអាចមកពិនិត្យ និងទំនាក់ទំនងផ្ទាល់នៅស្ថាប័នអយ្យការអមសាលាដំបូងខេត្តកំពង់ឆ្នាំង ដោយត្រូវភ្ជាប់មកជាមួយនូវឯកសាររថយន្តមកជាមួយផង៕

ដោយ ហ៊ុយ វណ្ណៈ 2008-10-24 ការប្រើប្រាស់ដោយមិនត្រឹមត្រូវ នូវផ្លាកលេខរថយន្តទាហាននិងនគរបាល រថយន្តនិងទោចក្រយានយន្តដែលមានពាក់ផ្លាកលេខខេមរភូមិន្ទនិងពាក់ផ្លាកលេខនគរបាលផងនោះ ត្រូវគេសង្កេតឃើញជនពាក់ឯកសណ្ឋានស៊ីវិលនិងយុវជនផង បានកំពុងប្រើប្រាស់ជាមធ្យោបាយធ្វើដំណើរជាលក្ខណៈគ្រួសារ ឬធ្វើចរាចរណ៍ជាការកម្សាន្តនៅលើដងផ្លូវក្នុងប្រទេសកម្ពុជា។ ជុំវិញការប្រើប្រាស់រថយន្តរបស់ជនស៊ីវិល ដោយមានពាក់ផ្លាកលេខផ្លូវការរបស់រដ្ឋ គឺផ្លាកលេខខេមរភូមិន្ទនិងពាក់ផ្លាកលេខនគរបាលនោះ លោក កែវ សាវិន ជាប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការនិងដឹកជញ្ជូន និងជាសមាជិកក្រុមការងារតាក់តែងច្បាប់ចរាចរណ៍ផ្លូវគោក បានថ្លែងថា រថយន្តរបស់កម្មសិទ្ធិជនស៊ីវិលដែលពាក់ផ្លាកលេខរដ្ឋទាំងនោះត្រូវបានចាត់ទុកថា ជារថយន្តខុសច្បាប់។

លោក កែវ សាវិន មានប្រសាសន៍ដូច្នេះថា ៖ «ឡានដែលគេជិះរាល់ថ្ងៃនេះ មានឡង់គ្រិស័រ មានឡានតូច ឡានធំ មានម៉ូតូ ដែលមានដាក់ស្លាកលេខទាំងអស់នេះ គឺសុទ្ធតែក្លែងក្លាយទាំងអស់ គឺខុសច្បាប់ មិនថា ក្លែងក្លាយទេ គឺគេចុះបញ្ជីរបស់គេត្រឹមត្រូវ ប៉ុន្តែខុសច្បាប់ទាំងអស់។ ហើយបើថា របស់ខ្លួនជារបស់រដ្ឋមែន គឺលេខនគរបាលជាតិ គឺមានលេខរដ្ឋ ០៧ ហើយខាងយោធា គឺរដ្ឋ០៦។ អ៊ីចឹងបើថាជារបស់រដ្ឋ គឺត្រូវតែទៅពាក់លេខ ០៦ ឬ ០៧ ប៉ុន្តែបើពាក់ ន.ប. ឬក៏ខេមរភូមិន្ទ ជញ្ជាំងវាដាច់ខាតត្រូវតែដាក់ឡូហ្គោ ពីព្រោះជាឡានដែលដាក់សញ្ញាឡូហ្គោទៅតាមប្រភេទពណ៌ ដែលអង្គភាពគេត្រូវដាក់»។

រថយន្តភាគច្រើនដែលមានពាក់ផ្លាកលេខខេមរភូមិន្ទ ឬពាក់ផ្លាកលេខនគរបាល ត្រូវគេសង្កេតឃើញថា មិនមានពាក់រូបសញ្ញាខេមរភូមិន្ទ ឬរូបសញ្ញានគរបាលជាតិនៅលើជញ្ជាំងរថយន្តនោះឡើយ។

លោក កែវ សាវិន បានអធិប្បាយតាមផ្លូវច្បាប់អំពីរបៀបនៃការប្រើប្រាស់រថយន្តដែលពាក់ផ្លាកលេខខេមរភូមិន្ទ ឬពាក់ផ្លាកលេខនគរបាលទាំងនេះយ៉ាងដូច្នេះថា៖ «របស់រដ្ឋហ្នឹង គឺគេដាក់នគរបាល ឬក៏ខេមរភូមិន្ទហ្នឹង គឺជាស្លាកលេខសម្រាប់យានយន្តពិសេស សម្រាប់តែការពារសន្តិសុខសណ្ដាប់ធ្នាប់ដឹកទ័ព ឬក៏បំពាក់ទៅលើ[រថពាសដែក] ឬក៏រថក្រោះ ឬក៏ថា យានយន្តពិសេសដើម្បីបម្រើឲ្យសុវត្ថិភាពដឹកជញ្ជូនទ័ព សុវត្ថិភាពអីទេ។ ហើយស្លាកហ្នឹង គឺយានទាំងឡាយនោះ គឺសុទ្ធតែមានឡូហ្គោទាំងអស់ ឡូហ្គោរបស់កងខេមរភូមិន្ទ ឡូហ្គោ របស់នគរបាលជាតិ»។

លោក កែវ សាវិន មានប្រសាសន៍បន្តទៀតថា ៖ «ហើយមិនអាចយកប័ណ្ណបើកបរសម្រាប់បើកយានយន្តបានជម្រាបជូនអម្បាញ់មិញហ្នឹង មកបើកលើផ្លូវសាធារណៈដូចយានយន្តសាមញ្ញបានទេ»។

ជាមួយនឹងការគូសបញ្ជាក់របស់លោក កែវ សុវិន អំពីការប្រើប្រាស់ផ្លាកលេខរថយន្តដោយអនាធិបតេយ្យ ជាពិសេសការប្រើប្រាស់ផ្លាកលេខរដ្ឋនោះនៅប្រទេសកម្ពុជា គេសង្កេតឃើញថា មានរថយន្តនិងទោចក្រយានយន្តពាក់ស្លាកលេខខុសៗយ៉ាងហោច ១៨ផ្លាកលេខសម្គាល់ ហើយនៅក្នុងនោះក៏មានមធ្យោបាយធ្វើដំណើរខ្លះ មិនមានផ្លាកលេខសម្គាល់ផងដែរ។

សម្រាប់រថយន្ត គេសង្កេតឃើញថា មានពាក់ស្លាកលេខខុសៗដូចជា ផ្លាកលេខស៊ីវិលស៊េរីថ្មី និងស៊េរីចាស់ ផ្លាកលេខបណ្តោះអាសន្ន ផ្លាកលេខខេមរភូមិន្ទ ផ្លាកលេខនគរបាល រាជការ ផ្លាកលេខរដ្ឋ រដ្ឋសភា ព្រឹទ្ធសភា ព្រះបរមរាជវាំង។ ជាមួយគ្នានេះ រថយន្តខ្លះទៀតពាក់ផ្លាកលេខជាភាសាអង់គ្លេស ដូចជា AT, OI, ONU, ONG, CMD និង CD ជាដើម។

ក្នុងចំណោមរថយន្តទាំងនោះ ក៏មានរថយន្តខ្លះទៀត ថែមទាំងមានប្រើប្រាស់ប័ណ្ណអនុញ្ញាតចេញចូលពិសេសរបស់ក្រសួងការងារនីមួយៗ យ៉ាងហោចពីមួយផ្លាករហូត ៤ ឬ ៥ផ្លាកផ្សេងៗគ្នាផង ដោយផ្លាកទាំងនោះត្រូវគេបំពាក់នៅកញ្ចក់រថយន្តខាងមុខ។

ចំណែកឯទោចក្រយានយន្តឬម៉ូតូវិញ គេក៏ឃើញមានពាក់ផ្លាកលេខខុសៗគ្នាផងដែរ ដែលក្នុងនោះ រួមមានផ្លាកលេខស៊ីវិលស៊េរីថ្មីនិងស៊េរីចាស់ ផ្លាកលេខនគរបាល ផ្លាកលេខខេមរភូមិន្ទ ផ្លាកលេខសារព័ត៌មាន ផ្លាកលេខ OI និង ONG ហើយក៏មានម៉ូតូមិនមានពាក់ផ្លាកលេខដែរ ក៏ប៉ុន្តែគេឃើញមានកំពុងធ្វើចរាចរណ៍នៅលើដងផ្លូវនៅឡើយ។

ច្បាប់ចរាចរណ៍ផ្លូវគោក ត្រូវបានព្រះករុណាព្រះបាទ នរោត្តម សីហមុនី ឡាយព្រះហស្តលេខាឲ្យប្រើប្រាស់ជាផ្លូវការ កាលពីដើមឆ្នាំ២០០៧។

លោក កែវ សាវិន មានប្រសាសន៍ថា បន្ទាប់ពីច្បាប់នេះចូលជាធរមានរយៈពេលមួយឆ្នាំ រថយន្តឯកជនទាំងអស់ គឺច្បាប់តម្រូវឲ្យប្រើប្រាស់ស្លាកលេខឯកជន បើមិនដូច្នេះទេ គឺជាការខុសច្បាប់ ៖ «គឺខុសច្បាប់ហើយ ល្មើសនឹងច្បាប់ហើយ ខុសតែម្ដង ព្រោះច្បាប់មិនអនុញ្ញាតទេ មានទទួលទោសយ៉ាងម៉េចៗ គឺមាននៅក្នុងច្បាប់គេ»។

ចំណែកឯមន្ត្រីចរាចរណ៍ផ្លូវគោកមួយរូបមានប្រសាសន៍ថា បើទោះបីជាច្បាប់ចរាចរណ៍ផ្លូវគោកនេះ តម្រូវឲ្យអនុវត្តចំពោះយានយន្តដែលពាក់ផ្លាកលេខមិនត្រឹមត្រូវ ចាប់តាំងពីខែមីនា ឆ្នាំ២០០៨នេះក៏ដោយ ក៏ប៉ុន្តែរហូតមកទល់ពេលនេះ សមត្ថកិច្ចនគរបាលចរាចរណ៍មិនអាចចាត់វិធានការចំពោះការបំពានច្បាប់នេះនៅឡើយទេ។

រថយន្តមួយចំនួន មិនត្រឹមតែពាក់ផ្លាកលេខខេមរភូមិន្ទ ឬពាក់ផ្លាកលេខនគរបាល ដោយមិនត្រឹមត្រូវនោះទេ សូម្បីតែការបើកបរក៏មិនត្រឹមត្រូវដែរ។

ប្រធានការិយាល័យនគរបាលចរាចរណ៍ផ្លូវគោករាជធានីភ្នំពេញ គឺលោក ទីន ប្រសើរ មានប្រសាសន៍យ៉ាងដូច្នេះថា ៖ «អាហ្នឹងយើងមើល ដូចទម្លាប់អាក្រក់ពីមុនមក ជួនកាលឡានឯកជនខ្លះ ក៏គេសុំស្លាកលេខរបស់រដ្ឋដែរ ព្រោះខាងក្រសួងមហាផ្ទៃ មានសេចក្ដីជូនដំណឹងមួយ ហើយថា ស្លាកលេខរដ្ឋហ្នឹង ត្រូវតែមានបំពាក់ស្លាកលេខ ន.ប. អ៊ីចឹង ត្រូវមានប័ណ្ណសម្គាល់រថយន្តអីត្រឹមត្រូវអ៊ីចឹង ប៉ុន្តែកន្លងមក ក៏ការត្រួតពិនិត្យហ្នឹង វាមានការលំបាកណាស់ សូម្បីតែអ្នកមានបណ្ដាស័ក្ដិ អ្នកស៊ីវិលយើងធម្មតាហ្នឹង ក៏មានប្រើប្រាស់ដែរ ប្រើប្រាស់លេខក្លែងក្លាយអ៊ីចឹងដែរ ស័ក្ដិធំៗពេកក៏ពិបាកដែរ»។

លោក ទីន ប្រសើរ មានប្រសាសន៍បន្តទៀតថា មានតែការបង្កើតក្រុមត្រួតពិនិត្យចម្រុះដែលរួមមានក្រសួងសាធារណការនិងដឹកជញ្ជូន ក្រសួងមហាផ្ទៃ និងក្រសួងការពារជាតិប៉ុណ្ណោះ ទើបអាចបង្ក្រាបករណីប្រើប្រាស់ផ្លាកលេខមិនត្រឹមត្រូវនេះបាន។

លោក ទីន ប្រសើរ ថ្លែងដូច្នេះថា ៖ «សហការគ្នាបង្កើតក្រុមចម្រុះមួយអ៊ីចឹងទៅ អាហ្នឹងបានធ្វើបាន បើធ្វើតែប៉ូលិសចរាចរណ៍ទេ អត់បានទេ»។

កន្លងមកថ្មីៗនេះ យានយន្តពាក់ផ្លាកលេខខេមរភូមិន្ទធ្លាប់ត្រូវលោកនាយករដ្ឋមន្ត្រី ហ៊ុន សែន លើកឡើងនៅក្នុងកិច្ចប្រជុំជាមួយអ្នកវិនិយោគឯកជនថា រថយន្តមួយចំនួននោះ ត្រូវបានគេប្រើប្រាស់យកទៅដឹកទំនិញឯកជន។

លោកនាយករដ្ឋមន្ត្រី ហ៊ុន សែន កន្លងមក ក៏ធ្លាប់បញ្ជាឲ្យមានការបកជ័រផ្លាស្ទិចពណ៌ខ្មៅឬពណ៌ទឹកតែ ដែលបិទជាប់នៅកញ្ចក់ទ្វារទាំងសងខាងនៃរថយន្តផងដែរ ដើម្បីបង្ការនិងបង្រ្កាបបទល្មើសចាប់ជំរិតនាពេលនោះ។

ទោះបីយ៉ាងណាក៏ដោយ ករណីនៃការប្រើប្រាស់ផ្លាកលេខយានយន្តដោយមិនត្រឹមត្រូវនេះ នៅមិនទាន់មានកិច្ចអន្តរាគមន៍បង្រ្កាបនៅឡើយទេ៕