ការចិញ្ចឹមជ្រូកនៅកម្ពុជា សឹងតែមិនចាំបាច់អានសៀវភៅ ឬ ឯកសាររបស់ ក្រសួងក៍បានដែរ ព្រោះមិនសូវមានប្រយោជន៍ ដោយសារ ៖ តម្លៃសាច់ជ្រូកនៅ ថៃ គឺ ២,៣ដុល្លា/គក ហើយរដ្ឋាភិបាលថៃចេញសេចក្តីបង្គាប់ជាច្បាប់ថា តម្លៃសាច់ជ្រូកត្រូវមានតម្លៃមិនលើស ២,៦ ដុល្លា/គក។ នៅប្រទេសវៀតណាម តម្លៃ ៤ ដុល្លា គឺភាគខាងជើង និង ៣,៩ ដុល្លា នៅវៀតណាមកណ្តាល និង ៣,៨ដុល្លា នៅវៀតណាមខាងត្បូងជាប់កម្ពុជា។ ចំណែកនៅកម្ពុជា គឺ ២៧,០០០ រៀល ត្រូវជា ៧ ដុល្លា/គក សម្រាប់ជ្រូកនាំចូល និង ៣០,០០០ រៀល ស្មើរ ៧,៥ដុល្លា/គក ។ ដូច្នេះ ទោះជាខំចិញ្ចឹម ក៍មិនថោកជាង ជ្រូកនាំចូលដែរ !! ខណៈដែលតម្លៃជ្រួក រស់ នាំចូលពី ថៃ គឺ ៣៦ដុល្លា/១០០គក ដែលត្រូវជា ០,៣ ដុល្លា/គក។ នេះជាមូលហេតុថៃ ស្តីបន្ទោសរឿងជ្រូកនាំចូល កម្ពុជា តែឆ្លងទៅវៀតណាម ឬ ជ្រូកនាំចូល ឡាវ តែឆ្លងចូល វៀតណាម !! ការបង្កើនគីឡូជ្រូកនៅ បរទេសគឺ ១,៨ ទៅ ២,៣ គក/ថ្ងៃ ដូច្នេះបើកម្ពុជាចិញ្ចឹមរយៈពេលវែង ការចំណាយកាន់តែច្រើន។ កម្ពុជា គ្មានរដូវ ២ ដាច់ដោយឡែកទេ មានន័យថា ខែប្រាំង និង ខែវស្សា គឺប្រើចំណីតែមួយ បើនៅបរទេស ខែត្រជាក់ប្រើចំណីអស់ច្រើន ព្រោះជ្រូកស៊ីច្រើន ទប់ទល់អាកាសធាតុ ជម្ងឺ..។
តម្លៃជ្រូកនៃការចំណាយលើការចិញ្ចឹមជ្រូករស់ និងការផលិតចេញជា សាច់ជ្រូកមានដូចខាងក្រោម
- Purchase Price $100 ទិញកូនជ្រូកពួជ អាចអាយុ ២ ខែ ឬ ០៣ តម្លៃ ១០០ដុល្លា (១៧%)
- Feed Costs $115 តម្លៃការចំណាយលើចំណីជ្រូក ១១៥ ដុល្លា រយៈពេល ៣ខែ (១៩%)
- Slaughter $60 តម្លៃការចំណាយការសម្លាប់ជ្រូក ៦០ដុល្លា (១០%)
- Butchering $100 តម្លៃចំណាយសម្រាប់ការពន្លះសាច់ជ្រូក កោសស្បែក ពុះជ្រូក (១៧%)
- Labor Cost ការចំណាយសម្រាបកម្លាំងពលកម្ម ៣ខែ ស្មើរ ២២៥ ដុល្លា (៣៨%)
- Total Cost: $ 600 សរុបការចំណាយ ៦០០ ដុល្លា
ទម្ងន់ជ្រូកចុងក្រោយពេលចាប់លក់ គឺ ៦៨ គីឡូក្រាម/រយៈពេល ០៣ ខែ (អាយុសរុបរបស់ជ្រូកគឺ ០៦ខែ) ដូច្នេះ បើគេបូកតម្លៃពលកម្ម នោះជ្រូកនឹងកាន់តែថ្លៃ។ មួយទៀត ប្រទេសថៃ ប្រទេសវៀតណាម និយមនាំជ្រូករស់ ចូលកម្ពុជា ព្រោះមិនចំណាយថ្លៃ សត្តឃាដ និងគារពន្លះសាច់ជ្រូក នេះជាមូលហេតុដែលគេនាំជ្រូករស់ចូលកម្ពុជាក្នុងតម្លៃ តែ ០,៣ ដុល្លា/គីឡូក្រាម ខណៈនៅកម្ពុជាតម្លៃជ្រូករស់ គឺ ៣ ដុល្លា/គីឡូក្រាម។ វៀតណាម នាំជ្រូករស់ចេញពីកម្ពុជា យកទៅបំប៉ន រួចនាំជ្រូកសាច់ ជ្រូកធំចូលមកវិញ ចំណែកប្រទេសថៃ ស្នើរសុំនាំជ្រួករស់ ១ លានក្បាល ចូលកម្ពុជា តែត្រូវកម្ពុជា បដិសេធ ចោល។ ជាដំណោះស្រាយភាគី កម្ពុជា ត្រូវសហការណ៍ជាមួយចិន កសាងកសិដ្ឋានផលិតពូជជ្រូក (តម្លៃដើម) រោងចក្រផលិតចំណីសត្វ និង រោងចក្រសត្តឃាដ ដើម្បី លក់ជ្រូកចេញជា Accessory ដូចជា ពោះវៀន ត្រចៀក ជើង ក្បាល....ជាជាងកម្ពុជា នាំចូលពោះវៀនជ្រូកពី វៀតណាម។ ចំណែកវៀតណាម នាំជ្រូកចូលពី ថៃ ឆ្លងកាត់កម្ពុជា តែតម្លៃសាច់ជ្រូកមានត្រឹមតែ ៤ដុល្លា/គីឡូ បានន័យថា ការចំណាយលើ សត្តឃាដ និងការពន្លះសាច់ ការដឹកជញ្ជូនរបស់វៀតណាម ថៃ គឺល្អជាងកម្ពុជា ថោកជាងកម្ពុជា Logistic System
.jpg)
ភ្នំពេញៈ បើទោះបីតម្រូវការនៅលើទីផ្សារមិនមានកំណើន ប៉ុន្តែបរិមាណនៃការចិញ្ចឹមជ្រូកនៅកម្ពុជានាអំឡុងពេលការរីករាលជំងឺកូវីដ ១៩ នេះបានស្ទុះកើនឡើងច្រើនជាមួយក្តីសុទិដ្ឋិនិយមថា ការនាំចូលជ្រូកពីប្រទេសជិតខាងនឹងត្រូវកាត់បន្ថយបន្ទាប់ពីច្រកព្រំដែនបើកទូលាយឡើងវិញ។ នេះបើយោងតាមអ្នកនៅក្នុងវិស័យចិញ្ចឹមជ្រូកនៅកម្ពុជា។
វិបត្តិជំងឺកូវីដ ១៩ បានជំរុញឱ្យរដ្ឋាភិបាលកម្ពុជាដាក់ចេញនូវគោលនយោបាយជាច្រើន ជាពិសេសក្នុងវិស័យកសិកម្មដើម្បីធ្វើយ៉ាងណាឱ្យកម្ពុជាមានឯករាជ្យក្នុងការផ្គត់ផ្គង់ម្ហូបអាហារ តាមរយៈការពង្រឹង និងពង្រីកសក្តានុពលដាំដុះដំណាំកសិកម្ម និងការចិញ្ចឹមសត្វ។
កាលពីដើមខែកក្កដា ឆ្នាំ ២០២០ ក្រសួងកសិកម្ម រុក្ខាប្រមាញ់ និងនេសាទ បានចេញសារាចរមួយដោយបានសរសេរថា កម្ពុជាត្រូវខិតខំជំរុញការចិញ្ចឹមសត្វ ដើម្បីធានាការផ្គត់ផ្គង់សាច់ និងផលិតផលសត្វសម្រាប់បំពេញតម្រូវការហូបចុករបស់ប្រជាជនដោយត្រូវរៀបចំយុទ្ធនាការបំផុសឱ្យកសិករដែលចិញ្ចឹមលក្ខណៈគ្រួសារឱ្យបង្កើនការចិញ្ចឹមសត្វដែលមានវដ្តផលិតកម្មខ្លី និងដោះស្រាយបានទាន់ពេលវេលាបញ្ហាសន្តិសុខស្បៀង។
ប្រធានសមាគមអ្នកចិញ្ចឹមសត្វកម្ពុជាលោក ស្រ៊ុន ពៅ បានប្រាប់ភ្នំពេញប៉ុស្តិ៍កាលពីថ្ងៃចន្ទថា សម្ទុះការចិញ្ចឹមជ្រូកនៅកម្ពុជាទាំងលក្ខណៈក្រុមហ៊ុន និងគ្រួសារ កំពុងកើនឡើងច្រើន ក្រោយពីបានធ្លាក់ចុះយ៉ាងខ្លាំងពេលផ្ទុះជំងឺប៉េស្តជ្រូកអាហ្វ្រិកកាលពីឆ្នាំ ២០១៩ ពិសេសបន្ទាប់ពីរដ្ឋាភិបាលតាមរយៈក្រសួងកសិកម្មខិតខំជំរុញ និងលើកទឹកចិត្តឱ្យមានការបង្កើនការផលិត និងដាំដុះក្នុងស្រុក។
ជាមួយនឹងកំណើនការចិញ្ចឹមពេលនេះ កម្ពុជាសង្ឃឹមថា ការនាំចូលជ្រូកពីបរទេសដើម្បីបំពេញតម្រូវការទីផ្សារនឹងត្រូវកាត់បន្ថយកាន់តែច្រើន ខណៈបច្ចុប្បន្នការនាំចូលជ្រូកពីប្រទេសថៃមានប្រហែលពី ២០-៣០ ភាគរយនៃតម្រូវការក្នុងស្រុកសរុប។
បច្ចុប្បន្ននេះតម្រូវការសាច់ជ្រូកនៅកម្ពុជាមានប្រមាណ ៧ ០០០ ក្បាល ទៅ ៨ ០០០ ក្បាល ក្នុង ១ ថ្ងៃ ក្នុងនោះជ្រូកក្នុងស្រុកមានប្រមាណ ៦ ០០០ ក្បាល។ តម្រូវការពេលនេះបានធ្លាក់ចុះបន្តិចបើធៀបនឹងមុនពេលមានវត្តមានជំងឺកូវីដ ១៩ ដោយសារតែមិនមានភ្ញៀវទេសចរ និងការរៀបចំពិធីបុណ្យ ឬរៀបអាពាហ៍ពិពាហ៍។ នេះបើតាមលោក ស្រ៊ុន ពៅ។
លោកថ្លែងថា៖ «នៅពេលនេះការនាំចូលជ្រូកពីប្រទេសជិតខាងមិនមានច្រើនដូចមុនទេ ព្រោះតម្រូវការទីផ្សារធ្លាក់ចុះ និងការចិញ្ចឹមក្នុងស្រុកកើនឡើង»។ លោកបន្ថែមថា៖ «ទោះយ៉ាងណាជាមួយនឹងស្ថានភាពសព្វថ្ងៃ ខ្ញុំគិតថានៅពេលតម្រូវការកើនឡើងវិញ (បន្ទាប់ពីកូវីដ១៩ បញ្ចប់) ការនាំចូលជ្រូកនឹងមិនមានច្រើនទៀតទេ»។
ជ្រូករស់ពេលនេះមានតម្លៃចន្លោះពី ១០ ១០០-១២ ៥០០ រៀល ខណៈរយៈពេលដូចគ្នាឆ្នាំមុនមានតម្លៃប្រហែល ៨ ០០០ រៀល។
យោងតាមលោក ស្រ៊ុន ពៅ ក្នុង ១ ថ្ងៃជ្រូកក្នុងស្រុកប្រមាណ ៦ ០០០ ក្បាល ត្រូវបានដាក់ចូលក្នុងទីផ្សារ ដែលភាគច្រើនបានមកពីក្រុមហ៊ុនធំៗចំនួន ៣ រួមមាន ក្រុមហ៊ុន CP, M's Pig ACMC Cambodia និង ក្រុមហ៊ុន Betagro។
លោក លី ឡាវីល ប្រធានគ្រប់គ្រងទូទៅក្រុមហ៊ុន M's Pig ACMC Cambodia co., Ltd បាននិយាយថា ក្នុងពេលនេះការចិញ្ចឹមជ្រូកកំពុងមានកំណើនច្រើន ព្រោះវាត្រូវបានអាជ្ញាធរយកចិត្តទុកដាក់ខ្លាំង ប៉ុន្តែអ្វីដែលលោកបារម្ភគឺនៅពេលកូវីដ ១៩ បញ្ចប់ទៅវិស័យនេះមិនត្រូវបានគេយកចិត្តទុកដាក់ខ្លាំងដូចពេលនេះ។ លោកបន្ថែមថា អ្នកចិញ្ចឹមកំពុងមានភាពរីករាយដែលជ្រូកក្នុងស្រុកមានទីផ្សារល្អ និងតម្លៃសមរម្យ។
លោកប្រាប់ថា៖ «នៅអំឡុងមានការឆ្លងរាលដាលកូវីដ ១៩ គេ (អាជ្ញាធរ) បានជួយទប់ស្កាត់ការនាំចូល និងជំរុញការចិញ្ចឹមក្នុងស្រុក ប៉ុន្តែនៅពេលជំងឺនេះអាចគ្រប់គ្រងបាន វាអាចនឹងមានការនាំចូលកើនឡើងវិញ ព្រោះមិនមានការបិទប្រទេសទៀតទេ»។
ជាមួយគ្នានេះលោកក៏បានស្នើឱ្យអាជ្ញាធរបង្កើនការយកចិត្តទុកដាក់ឱ្យបានកាន់តែខ្លាំងបន្ថែមទៀតផងដែរ។
យោងតាមលោក ឡាវីល ជាមធ្យមក្នុង ១ ថ្ងៃ ក្រុមហ៊ុនក្នុងស្រុកធំៗទាំង ៣ អាចផ្គត់ផ្គង់ជ្រូកប្រមាណជាង ៥ ០០០ ក្បាលទៅក្នុងទីផ្សារ។
លោក ចាន់ សុធា អ្នកគ្រប់គ្រងក្រុមហ៊ុន ហុក ហៀង ដែលមានកសិដ្ឋានចិញ្ចឹមជ្រូកប្រមាណ ៧០០ ក្បាលបានប្រាប់ថា បើទោះបីកសិដ្ឋានរបស់លោកមិនបានបង្កើនការចិញ្ចឹម ប៉ុន្តែលោកសង្កេតឃើញថា ការចិញ្ចឹមជ្រូកពេលនេះពិតជាមានសម្ទុះកើនឡើង ហើយតម្លៃក៏មានស្ថិរភាពល្អផងដែរ។ លោកបន្តថា៖ «បើមិនមានជ្រូកនាំចូលច្រើន និងមិនមានការផ្ទុះជំងឺដូចមុន ខ្ញុំគិតថា ការចិញ្ចឹមនឹងមានចំនួនកាន់តែខ្លាំងនៅពេលខាងមុខ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន កាលពីសប្តាហ៍មុនឱ្យដឹងថា ការចិញ្ចឹមសត្វទាំងលក្ខណៈគ្រួសារ និងឧស្សាហកម្ម កំពុងមានសម្ទុះគួរឱ្យកត់សម្គាល់ក្នុងរយៈពេលជិត ១ ឆ្នាំនេះដោយគិតពីខែមករា ដល់ដើមខែធ្នូ ឆ្នាំ ២០២០ ការចិញ្ចឹមសត្វជាលក្ខណៈគ្រួសារ និងឧស្សាហកម្ម ដូចជា គោ ក្របី ជ្រូក និងបក្សីបានកើនពី ៤២ ០២២ ១៣៧ ក្បាល ដល់ ៤៩ ៤២៣ ៥៥៨ ក្បាលដោយកើន ១៧,៦០ ភាគរយធៀបនឹងឆ្នាំ ២០១៩។ ដោយឡែកគិតមកដល់ពេលនេះនៅកម្ពុជាមានកសិដ្ឋានចិញ្ចឹមជ្រូក ៥៤៧ កន្លែងដែលមានជ្រូកសរុបជាង ១,៣៣ លានក្បាល កើន ១៥,៩ ភាគរយធៀបឆ្នាំ ២០១៩៕ LA
លោក ហ៊ុន សែន ថា ការនាំចូលជ្រូកពីក្រៅ ជាការសម្លាប់អ្នកចិញ្ចឹមក្នុងស្រុក
Byឌឹ ខេមបូឌា ដេលី
-July 16, 2020
លោក ហ៊ុន សែន លើកឡើងថាការបណ្តោយឱ្យមានការនាំសាច់ ជ្រូកពីក្រៅប្រទេសចូលមកកម្ពុជាជាការសម្លាប់អ្នកចិញ្ចឹមជ្រូកនៅក្នុងស្រុកតែម្តង។
ថ្លែងក្នុងពិធីពិនិត្យមជ្ឈមណ្ឌលបង្កាត់ពូជត្រី ចិញ្ចឹមត្រីនិងកង្កែបជាក់ស្តែង ព្រមទាំងសំណេះសំណាលជាមួយកសិករនៅខេត្តព្រៃវែងនៅថ្ងៃទី១៤ ខែកក្កដានេះ លោកហ៊ុន សែន អះអាងថា លោកបានច្រានចោលសំណើរនាំជូ្រករស់ចូលពីប្រទេសថៃ មកកម្ពុជាចំនួន១លានក្បាល ពីសំណាក់ក្រុមហ៊ុនមួយដើម្បីផ្គត់ផ្គង់ទីផ្សារក្នុងស្រុកនិងសម្រាប់នាំចេញបន្តទៅកាន់ប្រទេសវៀតណាម ។
លោកបញ្ជាក់ថា ការច្រានចោលនេះដើម្បីការពារកសិករចិញ្ចឹមក្នុងស្រុក ព្រោះប្រសិនបើយល់ព្រមឲ្យមានការនាំចូលជ្រូក១លានក្បាលនោះមកកម្ពុជាមែន ស្មើនឹង សម្លាប់កសិកររបស់ខ្មែរ ដែលកំពុងតែខិតខំចិញ្ចឹមជ្រូកនាពេលបច្ចុប្បន្ន។ លោកបន្ថែមថា ប្រសិនជាកម្ពុជាត្រូវការនាំចូលជ្រូក គឺអនុញ្ញាតឱ្យនាំចូលនៅពេលកម្ពុជាមិនអាចផ្គត់ផ្គង់បានគ្រប់គ្រាន់តែប៉ុណ្ណោះ។ ប៉ុន្តែបើការផ្គត់ផ្គង់តម្រូវការក្នុងស្រុកគ្រប់គ្រាន់ហើយ គឺមិនចាំបាច់នាំចូលពីគេទៀតឡើយ។ លោក ហ៊ុន សែន អះអាងថាកម្ពុជានៅមានសក្តានុពលខ្ពស់លើវិស័យកសិកម្ម ក្នុងនោះដីជាង ៤លានហិកតា សម្រាប់ដាំដុះដំណាំស្រូវ និងដំណាំផ្សេងទៀត នៅតែមានតម្រូវការខ្ពស់។
ជាមួយគ្នានោះលោកបានជំរុញឱ្យស្ថាប័នពាក់ព័ន្ធ ខិតខំជួយដល់កសិករ ដោយថា ការផ្តល់ចំណេះជំនាញកសិកម្ម ជារឿងសំខាន់ណាស់សម្រាប់ពលរដ្ឋ ពោលគឺសំខាន់ជាងការផ្តល់អំណោយផ្សេងៗទៅទៀត ខណៈដែលវប្បធម៌ផ្តល់អំណោយឱ្យពលរដ្ឋនេះ មន្ត្រីគណបក្សប្រជាជនកម្ពុជា និងមន្ត្រីរដ្ឋាភិបាលរបស់លោកហ៊ុន សែន តែងនិយមប្រើពិសេសនៅក្នុងរដូវកាលជិតបោះឆ្នោតមកដល់។
កាលពីថ្ងៃទី២ ខែមិថុនា ក្រសួងកសិកម្ម រុក្ខាប្រមាញ់ និងនេសាទ បានចេញសារាចរណែនាំថ្មីមួយ ស្ដីពីការបង្កើនយុទ្ធនាការជំរុញផលិតកម្មកសិកម្មនៅកម្ពុជា។
ក្រសួងកសិកម្មបញ្ជាក់ថា វិស័យកសិកម្មពិត ជាត្រូវឈរនៅក្នុងអាទិភាពមួយខ្ពស់ ដើម្បីឆ្លើយតបទៅនឹងបញ្ហាវិបត្តិកូវីដ១៩ ពិសេសពាក់ព័ន្ធនឹងការបង្កើនផលិតកម្មស្បៀង អាហារ អង្ករ ត្រី សាច់ ឱ្យបានគ្រប់គ្រាន់ សម្រាប់ការផ្គត់ផ្គង់ក្នុងស្រុក និងសម្រាប់ការនាំចេញទៅកាន់ទីផ្សារអន្តរជាតិ។
ប្រធានសមាគមសម្ព័ន្ធសហគមន៍កសិករកម្ពុជាលោក ថេង សាវឿន សាទរចំពោះវិធានការយកចិត្តទុកដាក់លើវិស័យកសិកម្មពីសំណាក់រដ្ឋាភិបាល ប៉ុន្តែលោកយល់ឃើញថាដើម្បីឱ្យផែនការនេះអាចសម្រេចទៅបាន ស្ថាប័នពាក់ព័ន្ធត្រូវមានយន្តការច្បាស់លាស់និងតាមដានជាប្រចាំចំពោះមន្ត្រីចុះអនុវត្ត ព្រមទាំងបើកឱកាសក្នុងការចូលរួមឱ្យបានកាន់តែទូលំទូលាយ ទាំងដៃគូអភិវឌ្ឍ វិស័យឯកជន អង្គការសង្គមស៊ីវិលជាដើម។
បន្ថែមពីនេះ ក្រសួងកសិកម្មផ្ទាល់គប្បីមានការពិភាក្សាជាមួយកសិករផ្ទាល់ អំពីបញ្ហាប្រឈមក្តី ពីតម្រូវការចាំបាច់ក្តី ដោយមានទាំងការបណ្តុះបណ្តាលបច្ចេកទេសជូនពួកគាត់ ផ្តល់ទុន រៀបចំប្រព័ន្ធធារាសាស្ត្រឱ្យបានត្រឹមត្រូវ និងគ្រប់គ្រាន់។
មន្រ្តីសង្គមស៊ីវិលរូបនេះ ក៏ចង់ឃើញយន្តការជួយដល់កសិករជំរុញលើវិស័យកសិកម្មនេះធ្វើឡើងជាប់ជាប្រចាំ ដើម្បីធានាដល់ការលើកកម្ពស់ជីវភាព និងសេដ្ឋកិច្ចប្រជាពលរដ្ឋកាន់តែប្រសើរ មិនមែនធ្វើឡើងតែពេលមានបញ្ហាកូវីដ១៩នោះឡើយ ៕
លោក ស្រ៊ុន ពៅ៖ ការនាំចេញជ្រូករស់ទៅលក់នៅវៀតណាមទើបតម្លៃជ្រូករស់ក្នុងស្រុកឡើងថ្លៃ សមាគមអ្នកចិញ្ចឹមសត្វកម្ពុជា បានឲ្យដឹងថា បច្ចុប្បន្ននេះតម្លៃជ្រូករស់មានតម្លៃ ១ម៉ឺន ៣ពាន់២០០រៀល ក្នុងមួយគីឡូក្រាម បន្ទាប់ពីតម្លៃ១២០០០រៀល ហក់ឡើងមកដល់១ម៉ឺន៤ពាន់២០០រៀលក្នុងមួយគីឡូក្រាម នៅគ្រាកន្លង។ ការធ្លាក់ថ្លៃបន្តិចនៅពេលនេះបន្ទាប់ពីមាន សំណូមពររបស់ក្រសួងកសិកម្ម ឲ្យសមាគមអ្នកចិញ្ចឹមសត្វអន្តរាគមន៍ ធ្វើយ៉ាងណាកុំឲ្យមានការតម្លើងតម្លៃជ្រូករស់ខ្ពស់ពេក ព្រោះធ្វើឲ្យប៉ះពាល់ដល់អ្នកបរិភោគ។ លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជាបានថ្លែប្រាប់វិទ្យុបារាំងអន្តរជាតិថា តម្លៃជ្រូករស់ ១២០០០រៀល ក្នុងមួយគីឡូក្រាមនឹងវិលមកវិញក្នុងពេលដ៏ឆាប់។ បើតាម លោក ស្រ៊ុន ពៅ មូលហេតុនាំឲ្យតម្លៃជ្រូករស់ឡើងថ្លៃដោយសារ កសិករអ្នកចិញ្ចឹមជ្រូក លួចនាំចេញជ្រូករស់ទៅលក់នៅវៀតណាម ទើបធ្វើឲ្យតម្លៃជ្រូករស់ក្នុងស្រុកឡើងថ្លៃ។ នេះព្រោះតែកសិករយល់ថា ជ្រូករស់នាំពីកម្ពុជាទៅលក់នៅវៀតណាមមានតម្លៃដងក្នុងមួយគីឡូនៃជ្រូករស់មានតម្លៃ១ម៉ឺន៧ពាន់រៀល។
ភ្នំពេញៈ សមាគមអ្នកចិញ្ចឹមសត្វកម្ពុជាបានស្នើឲ្យប្រជាជនខិតខំពង្រឹងការចិញ្ចឹមសត្វជ្រូកឡើងវិញ ដើម្បីកាត់បន្ថយការនាំចូល ខណៈបច្ចុប្បន្នជ្រូកកំពុងមានតម្រូវការច្រើន និងមានតម្លៃខ្ពស់។ នេះបើតាមប្រធានសមាគមអ្នកចិញ្ចឹមសត្វកម្ពុជា។ ទោះបីជាក្រសួងកសិកម្ម រុក្ខាប្រមាញ់ និងនេសាទកន្លងមកមានគោលនយោបាយចំពោះការពង្រឹងការចិញ្ចឹមជ្រូកនៅកម្ពុជាក៏ដោយ ប៉ុន្តែសកម្មភាពនៃការចិញ្ចឹមជ្រូកនៅកម្ពុជាគឺមិនមានទំហំធំដែលអាចផ្គត់ផ្គង់ទីផ្សារក្នុងស្រុកបានគ្រប់គ្រាន់ទេ ពិសេសបន្ទាប់ពីមានការរីករាលដាលនៃជំងឺប៉េស្តជ្រូកអាហ្វ្រិកកាលពីឆ្នាំ ២០១៩។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា មុនពេលផ្ទុះជំងឺប៉េស្តជ្រូកអាហ្វ្រិកការចិញ្ចឹមជ្រូកក្នុងស្រុកអាចផ្គត់ផ្គង់តម្រូវការទីផ្សារបានប្រមាណជិត ៨០ ភាគរយ ខណៈប្រមាណ ២០ ភាគរយទៀតត្រូវបាននាំចូលមកពីប្រទេសវៀតណាម និងថៃ។
ប៉ុន្តែបន្ទាប់ពីការផ្ទុះជំងឺប៉េស្តជ្រូកអាហ្វ្រិកដែលធ្វើឲ្យជ្រូកងាប់ជាច្រើននោះ ធ្វើឲ្យសមត្ថភាពនៃការផ្គត់ផ្គង់ក្នុងស្រុកធ្លាក់មកនៅត្រឹមប្រហែល ៦០ ភាគរយប៉ុណ្ណោះមកទល់ពេលនេះ។ លោកបន្តថា ការធ្លាក់ចុះនេះបានធ្វើឲ្យកម្ពុជាត្រូវនាំចូលជ្រូកពីប្រទេសថៃប្រហែល ២ ០០០ ទៅ ៣ ០០០ ក្បាល ជារៀងរាល់ថ្ងៃមកបំពេញតម្រូវការក្នុងស្រុក។
លោកថ្លែងថា៖ «យើងកំពុងមានកង្វះខាតច្រើន ហេតុនេះខ្ញុំស្នើឲ្យកសិដ្ឋាន ឬប្រជាជនគួរតែនាំគ្នាចាប់ផ្តើមការចិញ្ចឹមជ្រូកឡើងវិញឲ្យបានច្រើន។ ម្យ៉ាងទៀតតម្លៃជ្រូកនៅពេលនេះក៏ខ្ពស់ដែលអាចឲ្យអ្នកចិញ្ចឹមទទួលបានផលចំណេញច្រើនដែរ»។ តាមលោក ស្រ៊ុន ពៅ បច្ចុប្បន្នជ្រូករស់មានតម្លៃប្រមាណ ១៣ ០០០ រៀលក្នុង ១ គីឡូក្រាម (៤,៣ ដុល្លា) ខណៈរយៈពេលដូចគ្នាកាលពីឆ្នាំមុនមានតម្លៃប្រហែល ៨ ០០០ រៀល។ លោកប្រាប់ទៀតថាបច្ចុប្បន្ននៅកម្ពុជាតម្រូវការជ្រូកសម្រាប់បរិភោគ មានប្រមាណចន្លោះពី ៦ ០០០-៧ ០០០ ក្បាលក្នុង ១ ថ្ងៃ។ ជំងឺប៉េស្តជ្រូកអាហ្វ្រិកដែលផ្ទុះឡើងកាលពីឆ្នាំមុនធ្វើឲ្យសត្វជ្រូករាប់លានក្បាលត្រូវងាប់ និងសម្លាប់ក្នុងន័យទប់ស្កាត់ការរីករាលដាលជំងឺនេះទៅកាន់សត្វជ្រូកដទៃ។
ទិន្នន័យក្រសួងកសិកម្ម រុក្ខាប្រមាញ់ និងនេសាទកាលពីដើមខែកក្កដាឆ្នាំ ២០១៩ បានឲ្យដឹងថា នៅកម្ពុជាមានសត្វជ្រូកជាង ៣ ០០០ ក្បាលបានងាប់ នៅក្នុងខេត្តចំនួន ៥ រួមមាន ខេត្តរតនគិរី ត្បូងឃ្មុំ ស្វាយរៀង តាកែវ និងខេត្តកណ្ដាល។
ការផ្ទុះនៃជំងឺប៉េស្តជ្រូកអាហ្វ្រិកពីឆ្នាំមុនក៏បានធ្វើឲ្យអ្នកចិញ្ចឹមជ្រូកមួយចំនួនខ្លាចរអាមិនទាន់ហ៊ានចិញ្ចឹមឡើងវិញនោះទេ។
លោក ចន ហេង អ្នកចិញ្ចឹមជ្រូកមួយកន្លែងក្នុងស្រុកកៀនស្វាយ ខេត្តកណ្តាលដែលមានបទពិសោធជាង ១៥ ឆ្នាំបាននិយាយថា ក្រោយពីជំងឺប៉េស្តជ្រូកអាហ្វ្រិកបានឆ្លងចូលមកកម្ពុជាកាលពីឆ្នាំមុន លោកមិនទាន់បានចាប់ផ្តើមចិញ្ចឹមជ្រូកឡើងវិញទៀតទេ ព្រោះមិនទុកចិត្តថា មានសុវត្ថិភាព។
លោកបន្តថា ការចិញ្ចឹមត្រូវការរយៈពេល ៤-៥ ខែទើបអាចលក់បាន តែបើសិនជាមានជំងឺប៉េស្តជ្រូកអាហ្វ្រិកកើតឡើងគឺតែក្នុងរយៈពេលខ្លីប៉ុណ្ណោះ ជ្រូកនឹងត្រូវងាប់ទាំងអស់។ លោកនិយាយថា៖ «ខ្ញុំមិនទាន់ហ៊ានចិញ្ចឹមវិញទេ ព្រោះនៅពេលនេះមិនទាន់មានថ្នាំសម្រាប់ព្យាបាលជំងឺនេះ»។
លោកបន្តថា ការផ្ទុះឡើងនៃជំងឺប៉េស្តជ្រូកអាហ្វ្រិកកាលពីឆ្នាំមុន កសិដ្ឋានចិញ្ចឹមរបស់លោកមិនបានទទួលរងផលប៉ះពាល់ទេ ព្រោះជ្រូកប្រមាណជាង ១ ៥០០ ក្បាលត្រូវបានលក់ចេញទាំងអស់មុនពេលជំងឺប៉េស្តជ្រូកអាហ្វ្រិក រាលដាលមកដល់ជិតកសិដ្ឋានរបស់លោក។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានប្រាប់ថាក្រសួងមានគោលនយោបាយក្នុងការជំរុញឲ្យប្រជាជនចិញ្ចឹមជ្រូកឲ្យបានច្រើនដើម្បីផ្គត់ផ្គង់ទីផ្សារ។ លោកបន្តថា ការរាលដាលនៃជំងឺប៉េស្តជ្រូកអាហ្វ្រិកមួយរយៈនៅកម្ពុជាបានធ្វើឲ្យទឹកចិត្តអ្នកចិញ្ចឹមមានការរារែកក្នុងការចាប់ផ្តើមម្តងទៀត។ លោកបន្តថាការចិញ្ចឹមជ្រូកបានធ្លាក់ចុះយ៉ាងច្រើនកាលពីឆ្នាំ ២០១៩។
ទោះយ៉ាងណាលោកបញ្ជាក់ថា៖ «ខ្ញុំគិតថា ការចិញ្ចឹមជ្រូកនឹងមានកំណើនឡើងវិញនៅក្នុងឆ្នាំនេះ ព្រោះជ្រូកកំពុងមានទីផ្សារល្អ»។
លោក ស្រ៊ុន សុខុម អគ្គនាយករងនៃអគ្គនាយកដ្ឋានកសិកម្មកាលពីដើមខែកុម្ភៈនេះបានឲ្យដឹងថា តម្រូវការបរិភោគសាច់នៅកម្ពុជាពីឆ្នាំ ២០១៩ មានបរិមាណប្រហែល ២៩០ ០០០ តោន ខណៈការផ្គត់ផ្គង់មានចំនួន ២៤០ ០០០ តោន។ លោកបន្តថា៖ «យើងគ្រោងនឹងផលិតសាច់ពាហនៈ ៣៣៥ ០០០ តោន ក្នុងឆ្នាំ ២០៣០ ដើម្បីបំពេញកង្វះខាត និងកាត់បន្ថយការនាំចូល»។ លោក សុខុម បានឲ្យដឹងថាជាមួយនឹងផលិតកម្មសាច់សរុបនេះក្នុងនោះសាច់មាន់ ទា មានចំណែក ២០ ភាគរយ សាច់គោ ២៧ ភាគរយ និងជ្រូក ៥៧ ភាគរយ។
តាមអង្គការស្បៀងអាហារ និងកសិកម្មរបស់អង្គការសហប្រជាជាតិ ប្រជាជនកម្ពុជាបរិភោគសាច់ជាមធ្យម ១៧,៦ គីឡូក្រាម ម្នាក់ក្នុង ១ ឆ្នាំ ដែលរួមមានសាច់គោ ៥ គីឡូក្រាម សាច់ជ្រូក ៩,២៩ គីឡូក្រាម មាន់ទា ៣,៣ គីឡូក្រាម និងសាច់ផ្សេងទៀត ០,០១ គីឡូក្រាម៕
ភ្នំពេញៈ សមាគមអ្នកចិញ្ចឹមជ្រូកកម្ពុជាបានបញ្ជាក់ថា វិស័យចិញ្ចឹមជ្រូកនៅកម្ពុជានៅតែប្រឈមនឹងភាពរ៉ាំរ៉ៃដោយគ្មានអន្តរាគមន៍ពីស្ថាប័នណាមួយពីរដ្ឋាភិបាលនោះទេ ខណៈការនាំចូលជ្រូកទាំងស្របច្បាប់ និងគេចពន្ធពីប្រទេសវៀតណាមនៅតែបន្តកើនឡើងយ៉ាងអនាធិបតេយ្យ។
ការលើកឡើងបែបនេះ ធ្វើឡើងនៅក្នុងសន្និសីទសារព័ត៌មានមួយស្តីពី «វិបត្តិក្នុងវិស័យចិញ្ចឹមជ្រូកក្នុងស្រុក» កាលពីព្រឹកមិញនេះ។
លោកស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា ដែលមានសមាជិកជាអ្នកចិញ្ចឹមជ្រូកប្រមាណ ៤ ០០០ នាក់បានឲ្យដឹងថា សមាជិកចិញ្ចឹមជ្រូកជាងពាក់កណ្តាលបានសម្រេចបោះបង់ការចិញ្ចឹម ដោយមិនអាចបន្តរ៉ាប់រងការខាតបង់ទៀតបាន ខណៈភាគច្រើនកំពុងប្រឈមនឹងវិបត្តិបំណុលពីអាជីវកម្មនេះ។
ទិន្នន័យពីខាងសមាគមបង្ហាញថា តម្លៃជ្រូករស់នាពេលបច្ចុប្បន្នចេញពីកសិករគឺប្រហែល ៥ ៥០០ រៀល គឺទាបជាងថ្លៃដើមដែលមានរហូតដល់ ៨ ០០០រៀល ក្នុងមួយគីឡូក្រាម។
តំណាងសមាគមអ្នកចិញ្ចឹមសត្វកម្ពុជា បានបញ្ជាក់ថា បច្ចុប្បន្នការនាំចូលជ្រូកពីវៀតណាមតាមច្រកធំៗ បូកបញ្ចូលគ្នាមានយ៉ាងហោចណាស់ ១៨០០ ក្បាលក្នុងមួយថ្ងៃ ហើយបើបូកបញ្ចូលនឹងការនាំចូលគេចពន្ធតាមច្រករបៀងតាមបណ្តាខេត្តជាប់ព្រំដែនផ្សេងៗទៀត ចំនួនជ្រូកដែលនាំចូលជាក់ស្តែងពីប្រទេសវៀតណាមអាចកើនឡើងឡើងជិត ៣៦ ០០០ ក្បាលក្នុងមួយថ្ងៃ។
រដ្ឋមន្ត្រីក្រសួងកសិកម្មធ្លាប់បានសន្យាកាលពីដើមឆ្នាំនេះថានឹងដោះស្រាយបញ្ហានេះដើម្បីជួយកសិករចិញ្ចឹមជ្រូកក្នុងស្រុក ពិសេសការទប់ស្កាត់ការនាំចូលជ្រូកពីវៀតណាម។
ទីក្រុងណាននីងៈ តំណាងក្រសួងកសិកម្មកម្ពុជា និងក្រុមហ៊ុនជំនាញផ្នែកកសិកម្មចិនប្រចាំខេត្តក្វាងស៊ីកាលពីថ្ងៃអង្គារបានយល់ព្រមជាគោលការណ៍ក្នុងការសហការរួមគ្នាដើម្បីពង្រឹងការស្រាវជ្រាវផ្នែកបច្ចេកទេស និងអភិវឌ្ឍន៍ផលិតកម្មជ្រូកនៅកម្ពុជា។
ពិធីចុះហត្ថលេខាលើកិច្ចព្រមព្រៀងនេះបានធ្វើឡើងរវាងលោកសេន សុវណ្ណ អគ្គនាយកនៃអគ្គនាយកដ្ឋានផលិតកម្មសត្វ នៃក្រសួងកសិកម្មកម្ពុជា និង អ្នកស្រី Luo Wen Wen នាយកក្រុមហ៊ុន Guangxi Forward Agricultural Technology International Cooperation ជាផ្នែកមួយនៃការចូលរួមក្នុងពិធីពិព័រណ៍ពាណិជ្ជកម្ម ចិនអាស៊ាន លើកទី ១៤ ដែលធ្វើឡើងក្នុងទីក្រុង ណាននីង នៃខេត្ត ក្វាងស៊ី។
លោក សេន សុវណ្ណ បានប្រាប់ក្រុមអ្នកយកព័ត៌មានបន្ទាប់ពីពិធីចុះហត្ថលេខាថា កិច្ចព្រមព្រៀងដែលបានធ្វើឡើងជាមួយក្រុមហ៊ុនជំនាញផ្នែកកសិកម្មរបស់ចិននេះនឹងបើកផ្លូវឲ្យមន្ត្រីជំនាញនៃស្ថាប័នទាំងពីរធ្វើការពិភាក្សាពីស្ថានភាពនៃផលិតកម្មជ្រូកនៅកម្ពុជានាពេលបច្ចុប្បន្ន និងធ្វើផែនការបន្ទាប់សម្រាប់ការអភិវឌ្ឍរយៈពេលវែង។ លោកថ្លែងថា៖«ភាគីចិនបានបង្ហាញពីការតាំងចិត្តក្នុងការរួមចំណែកអភិវឌ្ឍន៍ផលិតកម្មជ្រូកនៅកម្ពុជា»។
លោកបន្តថា៖ «កិច្ចសន្យានេះធ្វើឡើងដោយផ្អែកលើគោលការណ៍សំខាន់ៗដូចជា ការស្រាវជ្រាវពូជជ្រូក វិធីសាស្ត្រនៃការចិញ្ចឹមជ្រូកឲ្យបានធំធាត់លឿន ហើយមានសក្តានុពល»។
កិច្ចព្រមព្រៀងនេះមិនទាន់បានកំណត់ទឹកប្រាក់ដែលត្រូវចាយវាយនោះទេ តែបើយោងតាមការអះអាងរបស់លោក សុវណ្ណ ភាគីក្រុមហ៊ុន Guangxi Forward Agricultural Technology International Cooperation នឹងបញ្ជូនក្រុមអ្នកបច្ចេកទេសដើម្បីធ្វើការជាមួយមន្ត្រីក្រសួងកសិកម្មកម្ពុជា។
កិច្ចព្រមព្រៀងនេះក៏បានកំណត់គោលដៅក្នុងការរៀបចំសហស្ថានីយបង្កាត់ពូជជ្រូក កម្ពុជា-ចិន ដោយក្រុមហ៊ុននឹងផ្ទេរនូវបច្ចេកវិទ្យាថ្មីក្នុងផលិតកម្មជ្រូក វិធីសាស្ត្រស្រាវជ្រាវបង្កាត់ពូជ ដែលសមស្របនឹងតម្រូវការជ្រូកនៅទីផ្សារក្រៅប្រទេស។
អ្នកជំនាញ៖ តម្លៃជ្រូករស់បន្តឡើងថ្លៃខ្ពស់ជាង ១សប្តាហ៍ហើយបើទោះបីការផ្គង់ផ្គង់សាច់សត្វនៅលើទីផ្សារក្នុងស្រុកមានចំនួនកើនឡើង ដែលជាសញ្ញាបង្ហាញឲ្យឃើញពីការកើនឡើងនៃមុខរបរចិញ្ចឹមសត្វក្នុងស្រុកនៅតាមកសិដ្ឋាននានាក៏ដោយចុះ ក៏ប៉ុន្តែតម្លៃជ្រូករស់នៅកម្ពុជាក្នុងរយៈប៉ុន្មានថ្ងៃចុងក្រោយនេះបានចាប់ផ្តើមហក់ឡើងថ្លៃខ្ពស់ឡើងវិញគួរឲ្យកត់សម្គាល់។ នេះបើតាមការបញ្ជាក់អះអាងរបស់សមាគមអ្នកចិញ្ចឹមសត្វកម្ពុជា។លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានគូសបញ្ជាក់ថា ការកើនឡើងតម្លៃសាច់ជ្រូករស់ក្នុងទីផ្សារពេលនេះ ដោយសារតែតម្លៃសាច់ជ្រូករស់ នៅប្រទេសវៀតណាមមានតម្លៃថ្លៃខ្ពស់ និងកំពុងតែមានតម្រូវការនាំចូលជ្រូកពីថៃ រួមទាំងកម្ពុជាដែរ។ លោកបន្តថា តម្លៃជ្រូករស់នៅវៀតណាម ១គីឡូក្រាមថ្លៃ ១៨.០០០រៀល ខណៈតម្លៃជ្រូករស់នៅកម្ពុជា ១គីឡូក្រាម ថ្លៃត្រឹម ១៣.០០០ រៀល។ ដូច្នេះ ចង់ឬមិនចង់វៀតណាមត្រូវតែទិញជ្រូកពីប្រទេសជិតខាង ខណៈតម្រូវការសាច់ជ្រូកក្នុងប្រទេសវៀតណាមច្រើនជាងការផ្គត់ផ្គង់។
លោកស្រ៊ុន ពៅបន្តថា ក្នុងពេលចាំបាច់នេះ វៀតណាមមិនត្រឹមតែមានតម្រូវការជ្រូកពីថៃ ប៉ុណ្ណោះទេ ជ្រូកពីកម្ពុជាក៏មានតម្រូវការដែរ ស្របពេលដែលកម្ពុជាខ្លួនឯងក៏កំពុងមានតម្រូវការសាច់ជ្រូកខ្លាំងដែរនោះ។ ត្រង់នេះហើយបានជាធ្វើឲ្យតម្លៃជ្រូកនៅកម្ពុជាហក់ឡើងថ្លៃខ្ពស់បែបនេះ ក្នុងតម្លៃជ្រូករស់ ១គីឡូក្រាមថ្លៃ ១៣.០០០រៀល បើធៀបកាលពីពេលមុន ជ្រូករស់ ១គីឡូក្រាម ថ្លៃ ១២.០០០រៀលប៉ុណ្ណោះ។លោកស្រ៊ុន ពៅអះអាងទៀតថា បើទោះបីបច្ចុប្បន្នការចិញ្ចឹមជ្រូកនៅកម្ពុជាមានការកើនឡើងពេលនេះក៏ដោយចុះ ក៏ប៉ុន្តែការចិញ្ចឹមរបស់យើងចិញ្ចឹមថ្ងៃនេះមិនមានន័យថា យើងអាចលក់ស្អែកវិញបាននោះឡើយ ពោលគឺត្រូវការពេលវេលាយ៉ាងតិចណាស់ ២ទៅ៣ខែទៅមុខទៀតដែរ។សូមជ្រាបថា កាលពីពេលថ្មីនេះ ក្រសួងកសិកម្មបានឲ្យដឹងថា គិតត្រឹមខែឧសភា ការផ្គង់ផ្គង់សាច់សត្វដល់ទីផ្សារក្នុងស្រុកមានចំនួនជាង ៤៣ លានក្បាល ដែលចិញ្ចឹមតាមកសិដ្ឋាននានា និងជាសញ្ញាបង្ហាញឲ្យឃើញពីការកើនឡើងនៃមុខរបរចិញ្ចឹមសត្វក្នុងស្រុកកាត់បន្ថយការនាំចូល។របាយការណ៍បង្ហាញថា គិតត្រឹមខែឧសភា កម្ពុជាអាចមានលទ្ធភាពផ្គត់ផ្គង់សាច់សត្វចំនួនជាង ៤៣លាន ក្បាល ស្មើនឹង ២៤ម៉ឺន តោនក្នុងនោះសត្វគោ និងក្របីមានចំនួនជា ៩ម៉ឺន តោន ស្មើនឹងជាង ៨២ម៉ឺន ក្បាល ដែលចិញ្ចឹមក្នុងកសិដ្ឋាន ៣៧ កន្លែង ខណៈការផ្គត់ផ្គង់ជ្រូកចំនួនជាង ១០ម៉ឺនតោន ស្មើនឹង ២ លានក្បាល ដែលចិញ្ចឹមក្នុងកសិដ្ឋានចំនួន ៥៣០ កន្លែង និងការចិញ្ចឹមលក្ខណៈគ្រួសារចំនួនជាង ១ លានក្បាល។ រីឯ សាច់បក្សីអាចមានលទ្ធភាពផ្គត់ផ្គង់ក្នុងស្រុកចំនួនជិត ៥ម៉ឺនតោន ស្មើនឹង ៤០ លានក្បាល ដែលចិញ្ចឹមក្នុងកសិដ្ឋាន ៨២៤ កន្លែង និង កសិករចិញ្ចឹមចំនួន ២៧ លានក្បាល។យ៉ាងណាក៏ដោយចុះ បើតាមលោកស្រ៊ុន ពៅ អ្វីដែលធ្វើឲ្យកម្ពុជាព្រួយបារម្ភ គឺបារម្ភខ្លាចតែតម្លៃសាច់ជ្រូកនៅប្រទេសថៃឡើងថ្លៃ ហើយក្នុងពេលជាមួយគ្នានេះ ថៃឈប់ អនុញ្ញាតឲ្យមានការនាំចូលជ្រូកមកកម្ពុជាដែរនោះ ពិតណាស់នឹងធ្វើឲ្យតម្លៃសាច់ជ្រូកនៅកម្ពុជាបន្តឡើងថ្លៃខ្ពស់កាន់តែខ្លាំង ដូច្នេះពលរដ្ឋកម្ពុជាត្រូវបន្តខិតខំចិញ្ចឹមជ្រូកបន្ថែម ដើម្បីកុំឲ្យកម្ពុជាជួបវិបត្តិសាច់ជ្រូកបានទៀតនោះឡើយ។លោក ស្រ៊ុន ពៅ បានឲ្យដឹងថា វៀតណាមមានតម្រូវការជ្រូកនាំចូលពី ក្នុងមួយថ្ងៃមានរហូត ២ពាន់ ទៅ៣ពាន់ក្បាល៕
អ្នកស្រី Luo Wen Wen នាយកក្រុមហ៊ុន Guangxi Forward Agricultural Technology International Cooperation បានលើកឡើងថា ផលិតកម្មចិញ្ចឹមសត្វនៅកម្ពុជា នៅមានកម្រិតទាបនៅឡើយ ដែលភាគច្រើនធ្វើឡើងជាលក្ខណៈគ្រួសារ ដោយមិនមានការសិក្សាពីសក្តានុពលពូជ និងការអនុវត្តតាមស្តង់ដារផលិតកម្មបានត្រឹមត្រូវនៅឡើយ។
អ្នកស្រីបន្តថា ក្រុមហ៊ុនអ្នកស្រីមានឆន្ទៈក្នុងការចូលរួមជាមួយរដ្ឋាភិបាលចិន ក្នុងការជួយលើកដំកើនផលិតកម្មចិញ្ចឹមសត្វនៅកម្ពុជាតាមរយៈការផ្តោតលើផលិតកម្មជ្រូកជាមុន។
អ្នកស្រីថ្លែងថា៖ «យើងនឹងបង្កើតឲ្យមានប្រភេទពូជជ្រូកជាច្រើនសម្រាប់ជាជម្រើសដល់អ្នកចិញ្ចឹម។ យើងចង់ ចែករំលែកចំណេះដឹងបច្ចេកទេសដែលយើងមានទាក់ទងនឹងផលិតកម្មចិញ្ចឹមសត្វដល់អ្នកចិញ្ចឹមសត្វនៅកម្ពុជា»៕
