ភ្នំពេញ៖ក្នុងរដូវប្រមូលផលស្រូវនេះ ធនាគារអភិវឌ្ឍន៍ជនបទ និងកសិកម្ម (ធ.អ.ជ.ក.) បានកត់សម្គាល់ឃើញថា ប្រជាកសិករនៅតាមបណ្តាខេត្តមួយចំនួន កំពុងសស្រាក់សស្រាំធ្វើការប្រមូលផលស្រូវសែនក្រអូប និងស្រូវ – ម្លិះ ឱ្យទាន់ពេលវេលា ក៏ប៉ុន្តែព្រមពេលជាមួយគ្នានេះ នៅតំបន់មួយចំនួន ការប្រមូលផលស្រូវទាំងពីរប្រភេទនេះ កំពុងប្រឈមមុខនិងការខ្វះខាតនូវកំលាំងពលកម្មដើម្បីច្រូតកាត់ ក៏ដូចជាខ្វះខាតម៉ាស៊ីនច្រូតកាត់ស្រូវធ្វើឱ្យការ ច្រូតកាត់មិនបានទាន់ពេលវេលា ដោយមូលហេតុការប្រមូលស្រូវក្នុងរដូវប្រមូលផលឆ្នាំនេះមានភាពសម្រុកខ្លាំងផ្ទួនគ្នា ហេតុដូចនេះធនាគារអភិវឌ្ឍន៍ជនបទ និងកសិកម្ម សូមធ្វើការអំពាវនាវដល់អ្នកដែលមានម៉ាស៊ីនច្រូតកាត់ស្រូវ សូមមេត្តាកុំដំឡើងថ្លៃឈ្នួល និងសូមរក្សាថ្លៃឈ្នួលដដែល។
ក្នុងសេចក្ដីអំពាវនាវរបស់ធនាគារអភិវឌ្ឍន៍ជនបទ និងកសិកម្ម នៅថ្ងៃទី២៩ ខែវិឆ្ឆិកា ឆ្នាំ២០២០នេះបានបញ្ជាក់ថា “ការសម្រុកប្រមូលផល និងកង្វះខាតមធ្យោបាយច្រូតកាត់នេះ បានធ្វើឱ្យថ្លៃឈ្នួលម៉ាស៊ីនច្រូតស្រូវក្នុងមួយគ្រឿងហក់ស្ទុះលើស ៣ ដង ធៀបនឹងថ្លៃឈ្នួលឆ្នាំមុន។ ប្រសិនបើសភាពការណ៍ខ្វះខាតមធ្យោ -បាយច្រូតកាត់នេះនៅតែអូសបន្លាយយូរថ្ងៃទៀត ស្រូវរបស់បងប្អូនប្រជាកសិករនៅក្នុងស្រែនឹងទុំជ្រុលជាហេតុ ធ្វើឱ្យបាត់បង់គុណភាពស្រូវ ព្រមទាំងធ្វើឱ្យថ្លៃស្រូវធ្លាក់ចុះផងដែរ”។
ដោយកត់សម្គាល់ឃើញពីបញ្ហាដូចខាងលើនេះ ធនាគារអភិវឌ្ឍន៍ជនបទ និងកសិកម្ម សូមធ្វើការ អំពាវនាវដល់ អាជ្ញាធរខេត្ត កងកម្លាំងប្រដាប់អាវុធ អាជ្ញាធរមូលដ្ឋាន យុវជនស្ម័គ្រចិត្ត ដែលកំពុងឈរជើងនៅតាមតំបន់ដែលកំពុងប្រមូលផលស្រូវសែនក្រអូប និងស្រូវម្លិះ មេត្តាចាត់ចែងកម្លាំងចុះជួយច្រូតកាត់ស្រូវរបស់បងប្អូនប្រជាកសិករជាបន្ទាន់ និងតាមលទ្ធភាពដែលអាចធ្វើបាន ដើម្បីជួយសម្រាលទុក្ខលំបាក ក៏ដូចជាជួយទប់ស្កាត់ការធ្លាក់ចុះថ្លៃស្រូវរបស់បងប្អូនប្រជាកសិករ ដែលអាចកើតឡើងដោយប្រការណាមួយ។
ធនាគារអភិវឌ្ឍន៍ជនបទ និងកសិកម្ម សូមថ្លែងអំណរគុណទុកជាមុន និងសង្ឃឹមយ៉ាងមុតមាំថា អាជ្ញាធរខេត្ត កងកម្លាំងប្រដាប់អាវុធ អាជ្ញាធរមូលដ្ឋាន យុវជនស្ម័គ្រចិត្ត ដែលកំពុងឈរជើងនៅតាមតំបន់ដែលមានការប្រមូលផលស្រូវសែនក្រអូប និងស្រូវម្លិះ នឹងចូលរួមសាមគ្គីគ្នាជាធ្លុង មួយ ដើម្បីជួយចម្លងភាពលំបាករបស់ប្រជាកសិករនៅគ្រានេះ៕
ធនាគារអភិវឌ្ឍន៍ជនបទ និងកសិកម្មថា តម្លៃឈ្នួលម៉ាស៊ីនច្រូតស្រូវឆ្នាំនេះកើនថ្លៃលើស ៣ដង ធៀបឆ្នាំមុន
ដោយសារតែការប្រមូលផលស្រូវនៅឆ្នាំនេះ មានការសម្រុកខ្លាំង និងកង្វះខាតមធ្យោបាយច្រូតកាត់ បានធ្វើឲ្យតម្លៃម៉ាស៊ីនច្រូតស្រូវក្នុងមួយគ្រឿងបានហក់ស្ទុះឡើងលើស៣ដង ថៀបនឹងនឹងថ្លៃឈ្នួលកាលពីឆ្នាំមុន។ នេះបើតាមការអះអាងរបស់ធនាគារអភិវឌ្ឍន៍ជនបទ និងកសិកម្ម។ ធនាគាររដ្ឋមួយនេះ ក៏បានអំពាវនាវដល់អាជ្ញាធរមូលដ្ឋាន និងកងកម្លាំង រួមទាំងយុវជនស្ម័គ្រចិត្តផង ឲ្យចុះជួយច្រូតស្រូវប្រជាកសិករដែលកំពុងជួបការលំបាកក្នុងការប្រមូលផល។សេចក្ដីអំពាវនាវរបស់ធនាគារអភិវឌ្ឍន៍ជនបទ និងកសិកម្ម ដែលបានចេញផ្សាយនៅថ្ងៃទី ២៩ ខែវិច្ឆិកា ឆ្នាំ២០២០ បានឲ្យដឹងថា ប្រជាកសិករនៅតាមបណ្ដាខេត្តមួយចំនួន កំពុងសស្រាក់សស្រាំ ធ្វើការប្រមូលផលស្រូវសែនក្រអូប និងស្រូវម្លិះ ក៏ប៉ុន្ដែ នៅតំបន់មួយចំនួន ការប្រមូលផលស្រូវទាំងពីរនេះ កំពុងប្រឈមនឹងការខ្វះខានូវកម្លាំងដើម្បីច្រូតកាត់ ក៏ដូចជា ម៉ាស៊ីនច្រូតកាត់ស្រូវមិនបានទាន់ពេលវេលាជាដើម ដោយសារតែការប្រមូលស្រូវនៅឆ្នាំនេះ មានភាពសម្រុកផ្ទួនៗគ្នា។
ធនាគារអភិវឌ្ឍន៍ជនបទ និងកសិកម្ម បានលើកឡើងយ៉ាងដូច្នេះថា «ប្រសិនបើសភាពការណ៍ខ្វះខាតមធ្យោបាយច្រូតកាត់នេះ នៅតែអូសបន្លាយយូរថ្ងៃទៀត ស្រូវរបស់បងប្អូនប្រជាកសិករ នៅក្នុងស្រែនឹងទុំជ្រុលជាហេតុធ្វើឲ្យបាត់បង់គុណភាពស្រូវ ព្រមទាំងធ្វើឲ្យថ្លៃស្រូវធ្លាក់ចុះផងដែរ»។ធនាគាររដ្ឋមួយនេះ ក៏បាន្អំពាវនាវដល់អាជ្ញាធរខេត្ត កងកម្លាំងប្រដាប់អាវុធ អាជ្ញាធរមូលដ្ឋាន យុវជនស្មគ្រចិត្ត ដែលកំពុងឈជើងនៅតាមតំបន់ដែលកំពុងប្រមូលផលស្រូវសែក្រអូបនិងស្រូវម្លិះ មេត្តាចាត់ចែងកម្លាំងចុះជួយច្រូតកាត់ស្រូវរបស់ប្រជាកសិករជាបន្ទាន់ និងតាមលទ្ធភាព ដើម្បីជួយសម្រាលទុក្ខលំបាក ក៏ដូចជាជួយទប់ស្កាត់ការធ្លាក់ថ្លៃស្រូវរបស់ប្រជាកសិករ ដែលអាចកើតឡើងដោយប្រការណាមួយ៕
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានលើកឡើងថា បើទោះបីជា អំឡុងជារដូវសម្រុកច្រូតកាត់ប្រមូលស្រូវក៏ដោយ ប៉ុន្ដែតម្លៃស្រូវលើទីផ្សារនៅតែរក្សាបានតម្លៃសមរម្យ មិនធ្លាប់ចុះខ្លាំងនោះទេ។
ពោលគឺ តម្លៃស្រូវជាមធ្យមនៅតែមានជាង ១ពាន់រៀលក្នុង មួយគីឡូក្រាម ហើយតម្លៃធ្លាក់ចុះក្រោម ១ពាន់ គឺសម្រាប់តែស្រូវដែលមិនសូវមានគុណភាពប៉ុណ្ណោះ។
លោក លន់ យ៉េង បន្ថែមថា តម្លៃម៉ាស៊ីនច្រូតស្រូវនៅឆ្នាំនេះ គឺមានថ្លៃខ្ពស់ជាងឆ្នាំមុនៗ ដោយពីមុន តម្លៃច្រូតស្រូវ ១ហិកតា តម្លៃតែ២០ម៉ឺនរៀលទេ ប៉ុន្ដែ ឥឡូវ ឡើងថ្លៃដល់ទៅ ជាង៥០ម៉ឺនរៀលទៅហើយ។
ដូច្នេះ វាជាកត្តាប្រឈមមួយសម្រាប់កសិករ ដោយសារតែ កសិករបច្ចុប្បន្នធ្វើស្រែមិនសូវមានច្រូតដៃដូចពីទៀតទេ គឺប្រើម៉ាស៊ីនច្រូតរបស់ឯកជន ដូច្នេះ បើថ្លៃឈ្នួលថ្លៃ ពួកគេប្រឈមនឹងការខាត។
ដូច្នេះ វិធានការចុះជួយពលរដ្ឋពេលប្រមូលផលឲ្យបានទាន់ពេលវេលានេះ វាគឺជារឿងមួយសំខាន់ណាស់ ដើម្បីរក្សាបានគុណភាពស្រូវនៅល្អផង និងជួយទប់កុំឲ្យតម្លៃស្រូវធ្លាក់ថ្លៃផងដែរ។
ដោយមើលឃើញពីការលំបាករបស់ប្រជាកសិករក្នុងពេលប្រមូលផលស្រូវនេះដែរ ធនាគាររដ្ឋ អភិវឌែ្ឍន៍ជនបទ និងកសិកម្ម ក៏បាន្អំពាវនាវដល់អាជ្ញាធរខេត្ត កងកម្លាំងប្រដាប់អាវុធ អាជ្ញាធរមូលដ្ឋាន យុវជនស្មគ្រចិត្ត ដែលកំពុងឈជើងនៅតាមតំបន់ដែលកំពុងប្រមូលផលស្រូវសែក្រអូប និងស្រូវម្លិះ មេត្តាចាត់ចែងកម្លាំងចុះជួយច្រូតកាត់ស្រូវរបស់ប្រជាកសិករជាបន្ទាន់ និងតាមលទ្ធភាព ដើម្បីជួយសម្រាលទុក្ខលំបាក ក៏ដូចជាជួយទប់ស្កាត់ការធ្លាក់ថ្លៃស្រូវរបស់ប្រជាកសិករ ដែលអាចកើតឡើងដោយប្រការណាមួយ។
របាយការណ៍ពីក្រសួងកសិកម្មបានឲ្យដឹងថា ក្នុងរយៈពេល ១០ខែ ដំបូងនៅឆ្នាំ២០២០នេះ កម្ពុជាបាននាំចេញស្រូវប្រមាណជាង ១លាន ៤សែនតោនទៅកាន់ប្រទេសវៀតណាម។ ដោយឡែក ការនាំចេញអង្កររបស់កម្ពុជានៅរយៈពេល១០ខែ មកនេះ សម្រេចបានជាង៥៣ម៉ឺន៦ពាន់តោន កើនឡើង ជាង១៧% ធៀបនឹងរយៈពេលដូចគ្នាកាលពីឆ្នាំមុន៕
កសិករ ត្អូញត្អែរនឹងតម្លៃឈ្នួលម៉ាស៊ីន ច្រូតស្រូវឡើងថ្លៃ តែតម្លៃស្រូវធ្លាក់ចុះ ដោយៈ ភ្នំស្វាយ / បន្ទាយមានជ័យៈ ទោះបីជានៅខេត្តបន្ទាយមានជ័យ រងគ្រោះធ្ងន់ធ្ងរជាងគេ ក្នុងប្រទេស នាខែកញ្ញា តុលា និងវិច្ឆិកា ឆ្នាំ២០២០ ក៏កសិករ ភាគច្រើន អះអាងថា ទិន្នផលស្រូវស្រាល នៅឆ្នាំនេះ មិនខុសពីឆ្នាំមុនទេ។ ប៉ុន្តែតម្លៃស្រូវស្រាល បានហក់ឡើង ដូចរាល់ឆ្នាំ នៅពេលការប្រមូលផល ដំបូងៗ ។
កសិករ បានលើកឡើងថាៈ លុះបន្តមក និងដល់ពេលនេះ តម្លៃស្រូវ បានធ្លាក់ចុះម្តងបន្តិចៗ ដូចតែរាល់ឆ្នាំ ដដែល។ ពោលគឺតម្លៃទិញ ពីកសិករ នៅតាមវាលស្រែ លើកឡើងឡាន ដោយក្រុមឈ្មួញនានា ស្រូវស្រាលពូជផ្ការំដួល និងពូជផ្កាម្លិះ បានថ្លៃ ៧៤០ រៀល ទៅ ៨០០ រៀល ក្នុង១ គ.ក្រ ឬថ្លៃ ៧៤០.០០០ ទៅ ៨០០.០០០ រៀល ក្នុង១ តោនស្រូវ ឬបើស្រូវពណ៌ល្អ ស្ងួតល្អ និងច្រូតហើយ ដឹកចេញភ្លាមៗ បានតម្លៃដល់ ៩០០.០០០ រៀល ក្នុង ១តោនស្រូវ។ បើស្រូវពូជម្លិះក្រហម ឆាកា និងពូជប្រពៃណី មានតម្លៃទាបជាងនេះ។ តម្លៃនេះ កសិករ បានត្អូញត្អែរថាៈ មិនទទួលបានផលចំណេញ ពីការធើ្វស្រែនោះទេ ព្រោះការធ្វើស្រែសព្វថ្ងៃ ចំណាយទុនថ្លៃខ្ពស់លើការភ្ជួររស់ ពូជ ជី ថ្នាំសម្លាប់សត្វល្អិត ថ្លៃច្រូតកាតនិងថ្លៃច្រក ដឹកជញ្ជូន ។ល។ម្ចាស់ម៉ាស៊ីនច្រូតស្រូវ មួយចំនួន បានប្រាប់កាសែត រស្មីកម្ពុជា នៅថ្ងៃទី២៣ ខែវិច្ឆិកា នេះថាៈ ពួកគេ ទទួលស្គាល់ថា តម្លៃឈ្នួលច្រូត បានឡើងថ្លៃច្រើនជាង ឆ្នាំ២០១៩ និងឆ្នាំមុនៗនេះ។ នោះមកពីម៉ាស៊ីនច្រូត ហាក់ថយចុះ ហើយម្ចាស់ម៉ាស៊ីនច្រូត ហាក់បានចិត្ត (អឿ) ព្រោះខុសពីរាល់ឆ្នាំ ដោយឆ្នាំនេះ កសិករម្ចាស់ស្រែ បានមកដេញថ្លៃ យកម៉ាស៊ីនច្រូត ដែលជាឱកាសអោយម្ចាស់ម៉ាស៊ីន អាចវាយឫក ហើយតម្លើងថ្លៃឈ្នួលច្រូតបាន ពោលគឺគេសម្រុកច្រូត ពីចន្លោះសប្តាហ៍ទី១ នៃខែវិច្ឆិកា មក ។ ជាមធ្យម តម្លៃឈ្នួលច្រូតម៉ាស៊ីនធំ (ម៉ាកសាក់ផាតថាក់ណា ថៃស៊ីនយាន់ ផនណារី ស៊ីនកូសាក់ សលមឃឺត … ថ្លៃ ៣.៣០០ ទៅ ៣.៥០០ បាត ប្រាក់ថៃ ក្នុង ១ ហិកតា (៤០ប្លាយម៉ឺនរៀល ) ។ ឯម៉ាស៊ិនមធ្យម (គឺម៉ាស៊ីនគូបូតា) យកថ្លៃទាបជាងនេះ គឺ ២.៨០០ ទៅ ៣.២០០ បាត ប្រាក់ថៃ ក្នុង ១ ហិកតា ។ បើធៀបនឹងឆ្នាំ២០១៩ និងឆ្នាំមុនៗ ថ្លៃតែ ២.២០០ បាត ក្នុង១ហិកតា សម្រាប់ម៉ាស៊ីនធំ និងថ្លៃ ១.៨០០ បាត ក្នុង ១ ហិកតា សម្រាប់ម៉ាស៊ិនមធ្យម ម៉ាកគូបូតា។ សូមបញ្ជាក់ថា ការច្រូតស្រូវ ដោយម៉ាស៊ីនធំ គឺសម្រាប់វាលស្រែធំៗ ហើយវាមានកញ្ច្រែងរែងល្អ បានគ្រាប់ស្រូវអស់ និងល្អ ដឹកដល់គោលដៅឆ្ងាយ។
ប្រជាកសិករ ម្ចាស់ស្រែស្រូវ បានបន្ថែមថាៈ ទន្ទឹមនឹងរងគ្រោះ ដោយទឹកជំនន់ កន្លងមក បង្កអោយប៉ះពាល់ ខូចខាតស្រូវ ពួកគេនៅជួបការខាតបង់ ឬមិនសូវចំណេញ ជាច្រើនទៀត មានតម្លៃស្រូវចុះថោក ហើយបញ្ហាធំមួយទៀត នៅតាមផ្លូវលំ និងផ្លូវជនបទ ផ្លូវខេត្តមួយចំនួន មន្ត្រីអាជ្ញាធរមានសមត្ថកិច្ច ហាមរថយន្តធំ របស់ឈ្នួញចូលទិញ និងដឹកស្រូវ។ ហេតុនេះ ម្ចាស់ស្រូវ ត្រូវចំណាយលើថ្លៃដឹកជញ្ជូនច្រើនតំណ និងត្រូវខាតពេល ហើយត្រូវឈ្មួញទិញ ស្រូវបង្អាប់ថ្លៃស្រូវ ។
ករណីនេះ មន្ត្រីអាជ្ញាធរ និងសមត្ថកិច្ចកងកម្លាំង បានបំភ្លឺប្រាប់កាសែតរស្មីកម្ពុជា នាល្ងាចថ្ងៃទី២៣ ខែវិច្ឆិកាថាៈ ទិន្នផលស្រូវ នៅខេត្តបន្ទាយមានជ័យ នាឆ្នាំនេះ បានល្អ (ពី ២,៥ ទៅ ៤តោន ក្នុង១ហិកតា) ។ ឯតម្លៃក៏មិនជាចុះថោកណាស់ណាទេ គឺសមរម្យហើយប៉ុណ្ណឹង។
ចំពោះការហាមរថយន្តធំ ផ្ទុកធ្ងន់ចូលតាមផ្លូវលំ ផ្លូវជនបទ គឺបានហាមប្រចាំថ្ងៃ ដូចរាល់ឆ្នាំទេ ពោលគឺ បើមិនហាម វាខុសនឹងល័ក្ខខ័ណ្ឌ ដែលបានស្ថាបនា និងប្រើប្រាស់ ។ នោះគឺផ្លូវថ្នល់ នឹងខូចខាតអស់ ចំណាយច្រើនជាងផលស្រូវ ឆ្ងាយណាស់៕/V
