ឧទ្យានជាតិគីរីរម្យ មានទីតាំងស្ថិតនៅ ភូមិដំរីផុត ឃុំគិរីរម្យ ស្រុកភ្នំស្រួចខេត្តកំពង់ស្ពឺ។
ជាឧទ្យានជាតិនៃព្រះរាជាណាចក្រកម្ពុជា ដែលស្ថិតនៅចំងាយ១១២គ.មពីរាជធានីភ្នំពេញ។ ឧទ្យានជាតិគីរីរម្យលាតសន្ធឹងលើផ្ទៃដីដែលមានព្រៃឈើប្រមាណ៨ម៉ឺនហិចតា។ភ្នំគិរីរម្យមានកំពស់៧០០ម៉ែត្រ។
ឧទ្យានជាតិគិរីរម្យ គឺជារមណីយដ្ឋានទេសចរណ៍ធម្មជាតិមួយដ៏ល្បី ក្នុងចំណោមរមណីយដ្ឋានឧទ្យានជាតិធំៗដទៃទៀតនៅក្នុងប្រទេសកម្ពុជា។ រមណីយដ្ឋានឧទ្យានជាតិនេះ សំបូរទៅដោយទេសភាពល្អប្រណិតលំអដោយដើមស្រល់ដុះពីធម្មជាតិនៅលើ ខ្ពង់រាបគិរីរម្យ។
នាថ្ងៃបុណ្យភ្ជុំបិណ្ឌ ទេសចរ ត្រូវចំណាយថវិកា ១ម៉ឺនរៀលក្នុងមួយរថយន្ត ដើម្បីចូលលេងកម្សាន្តលើភ្នំធម្មជាតិដ៏ធំសម្បើមក្នុងខេត្តកំពង់ស្ពឺ។ ប្រសិនបើទេសចរ ចូលកម្សាន្តកន្លែងមួយចំនួនទៀតដូចជា រមណីយដ្ឋានកែច្នៃដ៏ល្បី «រំហើយ គិរីរម្យ រីស៊ត» ទេសចរ នឹងត្រូវចំណាយ ១ម៉ឺនរៀល ប៉ុន្តែតម្លៃនេះ មិនថ្លៃនោះទេ បើធៀបនឹងការកែច្នៃកន្លែងទេសចរណ៍ និងការងារសម្អាតបរិស្ថាន។
គិរីរម្យ ស្ថិតនៅចម្ងាយប្រមាណ ១១២គីឡូម៉ែត្រ ពីរាជធានីភ្នំពេញ និងស្ថិតនៅក្នុងភូមិសាស្ត្រខេត្តកំពង់ស្ពឺ និងខេត្តព្រះសីហនុ ដោយលាតសន្ធឹងលើផ្ទៃដី ដែលមានព្រៃឈើប្រមាណ ៨ម៉ឺនហិចតា។ គិរីរម្យ ជា រមណីយដ្ឋានទេសចរណ៍ធម្មជាតិ ដែលមានទេសភាពល្អប្រណិត អាកាសធាតុល្អបរិសុទ្ធគ្រប់រដូវកាល និងដើមស្រល់ធម្មជាតិជាមួយនឹងជ្រោះជ្រង និងទឹកធ្លាក់ជាច្រើននៅលើកំពូលភ្នំ។
បើតាមក្រសួងទេសចរណ៍ គីរីរម្យ មានកន្លែងកម្សាន្តដូចជា រមណីយដ្ឋាន វីគិរីរម្យ ផាញរីស៊ត, រំហើយ គិរីរម្យ រីស៊ត, បឹងចំការតែ, ភូមិដំណាក់ដំរី, ទឹកធ្លាក់ឆៃយ៉ា, បឹងប៉េសេ, ឧទ្យានបោះតង់, ទឹកធ្លាក់អូតាសេក និងកន្លែងសម្រាប់បោះតង់ជាច្រើនទៀត។
ការធ្វើដំណើរទៅកម្សាន្តនៅភ្នំគិរីរម្យ មិនចំណាយថវិកាច្រើនប៉ុន្មាននោះទេ ព្រោះទេសចរជាតិភាគច្រើន យកអាហារទៅពិសា។ ប៉ុន្តែ ទេសចរជាតិមួយចំនួន បានបន្សល់ទុកសំរាម នៅលើភ្នំដ៏ស្អាតអស្ចារ្យមួយនេះ។ អ្នកខ្លះ មិនបានសម្អាតឱ្យស្អាតនោះទេ មុននឹងចាកចេញ ខណៈខ្លះទៀតប្រមូលសំរាមដាក់ថង់ទុកនៅកន្លែងគំនរសំរាមតែម្ដង។ ការថែរក្សាបរិស្ថានទីសាធារណៈ មិនមែនជាភារកិច្ចរបស់អ្នកណានោះទេ ពោលគឺជាភារកិច្ចរបស់មនុស្សគ្រប់រូប ដែលបានដើរកម្សាន្តនៅតាមកន្លែងនោះ៕
